For di dia 13 di maart 2020 te cu 27 di februari 2021 Aruba tin registra un total di 7429 caso positivo por medio di un test di COVID-19 bou di residente. 7429 caso positivo registra ta representa mas’o menos 6% di e populacion completo di Aruba. Esaki no ta suficiente pa reduci of stop e virus di plama atrobe y causa un biaha mas cu casonan di COVID ta aumenta drasticamente na Aruba.
Di e 7429 personanan residente registra positivo 7170 a recupera ful of a keda cu daño permanente of parcialmente di COVID-19. Esnan cu a recupera ta representa 97% di tur esnan positivo registra y lamentablemente a fayece 72 persona residente cu COVID-19 cu ta representa 1% di e 7429 persona cu a bin den contacto cu e virus. Esnan cu ainda porta no a bin den contacto cu e virus y ta na risico ta un averahe di mas’o menos 117.830 residente.
Desde 17 di februari 2021 cu a start cu e campaña di vacunacion Nacional contra COVID-19 te cu dia 27 di februari 2021, den un lapso di 10 dia Aruba a vacuna un total di 6005 persona riba 18 aña. Pa nos comunidad ta bon proteha contra COVID-19 y stop e plamamento di e virus, ta nesesario pa entre 75% cu 85% di nos comunidad tin anti-curpa pa e virus di COVID-19. Esaki por wordo logra door di bin den contacto cu e virus y a recupera di dje of door di vacuna. Resumiendo cu unicamente un promedio di mas’o menos 6% di comunidad a haya e virus y a recupera y te na e momento aki 6005 persona a risibi nan prome dosis di vacuna. Esaki no ta suficiente pa reduci y mucho menos stop e virus di sigui plama y causa un bote atrobe.
Mientras cu e mayoria den comunidad no ta vacuna cu 2 dosis ta imposibel pa Aruba por bolbe na normalidad. E recuperacion di Aruba su salud fisico, social, emocional y economia ta den man di nos cada uno. Mas lihe nos logra vacuna nos comunidad, mas lihe nos por kita of flexibilisa tur medida di proteccion. E solucion ta pa vacuna. Pa mas lihe cu ta posibel nos presencia nos Aruba one happy island un bes mas.
