Empresarionan na Hulanda Karibense pronto por apliká di nobo pa un kompensashon den nan gastunan fiho for di Ministerio di Asuntunan Ekonómiko i Klima (EZK). E montante di e di kuater kompensashon di EZK por varia entre $425 i $400.000. Ademas e empresarionan mas afektá pa e krísis di corona, por entregá un petishon pa fleksibilisashon den uso di e areglo di emergensia pa gastunan di salario, for di Ministerio di Asuntunan Sosial i Empleo (SZW).
Di kuater Kompensashon EZK
E kompensashon di EZK ta pa empresarionan ku pa motibu di e krísis di corona, tin mas difikultat pa karga nan gastunan fiho. Pa e di kuater kompensashon, ta kompará e sifranan di volúmen di benta di e lunanan òktober, novèmber i desèmber 2020 ku esnan di e mesun lunanan na 2019. E faktor di kompensashon ta mas haltu ku e kompensashon previo; e tabata 0.75 i awor ta bira 0,85. Esaki ta nifiká ku ounke ku nan bahada di volúmen di benta den porsentahe ta meskos ku e temporada anterior, empresarionan awor por bini na remarke pa un montante mas haltu.
Asina e areglo ta publiká den Staatscourant (ta spera esaki na komienso di mart), por apliká via di un formulario di aplikashon nobo ku lo bira disponibel riba e wèpsait di RCN. E kondishonnan i prosedimentu ta keda igual ku pa e di tres kompensashon di EZK.
Fleksibilisashon Areglo di Emergensia SZW
E sosten den gastunan di salario for di SZW ta sigui práktikamente sin kambio te 13 di yüli 2021. Pa e kompanianan mas afektá dor di e krísis di corona, for di promé di mart tin un eksepshon aplikabel. Bou di sierto kondishon nan por usa 25 porshento di e oranan di trabou di nan empleadonan, miéntras ku pa e oranan aki ta sigui risibí kompensashon di gastu si salario. E fleksibilisashon ta intenshoná pa reinisiá aktividatnan mas lihé ora ku e fluho di turista reanudá i ta yuda tambe pa tene e personal ‘fit’ pa traha.
115 empresa ta bini na remarke
Pa determiná kua ta e kompanianan mas afektá, ta afiliá ku e Kompensashon di EZK. Solamente kompanianan ku ya ta hasi uso di e areglo di emergensia di SZW i ku for di nan aplikashon pa e di tres kompensashon di EZK (periodo yüli te ku sèptèmber 2020) resultá ku nan tin di aber ku un pèrdida di volúmen di benta di por lo ménos 50 porshento, por hasi un apelashon riba e fleksibilisashon. Ta trata di 115 empresa na Boneiru, Saba i Sint Eustatius. Akuerdonan relashoná ku e eksepshon aki ta trahá den estrecho konsulta ku organisashonnan di dunadó di trabou.
Entregá aplikashon
Pa apelá na e fleksibilisashon, kompanianan mester entregá un petishon na unidat SZW di RCN. Despues di risibí aprobashon por eskrito, e dunadó di trabou mes, den konsulta ku e empleadonan, ta disidí kon i kua 25 porshento di e oranan di labor ta usa. Durante e durashon di e fleksibilisashon por varia den esaki. Kondishon ta ku por pone solamente empleadonan ku ya ta risibí kompensashon di salario p’e, bou di e 25 porshento.
Tur kondishon i informashon komplementario tokante e medidanan di sosten ta disponibel riba http://www.rijksdienstcn.com/covid-19 (bou di ‘Pakete di Emergensia Gobièrnu). Tambe ta haña aki tur e formularionan di aplikashon nesesario. Pa pregunta urgente por tuma kontakto ku unidat SZW di RCN via 781-5554 (Boneiru), 790-0052 (Sint Eustatius) i 416-3804 (Saba). Pa aplikashon pa e Kompensashon di EZK por tuma kontakto tambe ku e lokèt di sosten di Kámara di Komèrsio via steunloket@kvkbonaire.com.
