Henna Winklaar, pa basta aña kaba casemanager demensia na Fundashon Mariadal, ta e promé persona ku a haña angua contra corona na Boneiru. ‘Mi ta laga bakuná mi mes pasobra mi ta traha ku e grupo mas vulnerabel na Boneiru. Banda di esei mi ke protehá mi mes i motivá i stimulá mi koleganan pa tuma e angua,’ asina Winklaar a deklará despues ku el a pasa angua den e edifisio bieu di Forma.
Diputado Nina den Heyer a para banda di Winklaar ora ku el a pasa angua. Despues Den Heyer a duna Winklaar na nòmber di Kolegio Ehekutivo un bukèt di flor i yam’é danki. ‘Bo ta un fuente di inspirashon i un ehèmpel kon hende muhé na Boneiru ta skirbi historia di nobo,’ asina e diputado a bisa. Gezaghèber Edison Rijna i Representante di Reino interino Jan Helmond, direktor Giovanni Frans di Fundashon Mariadal i mènedjer médiko Theo Braeken di e mesun fundashon tambe tabata presente pa ta testigu di e promé angua kontra corona.
Gezaghèber Rijna a deskribí e dia komo un momentu históriko kaminda a fortifiká nos komunidat den e lucha kontra e pandemia. Representante di Reino interino Helmond a ekspresá e speransa ku tur hende na Boneiru lo laga bakuná nan mes. Direktor Frans di Fundashon Mariadal a para ketu na e echo ku COVID ta pone preshon riba kuido na nos isla i riba personal di kuido. Awor ku pasamentu di angua a kuminsá, Frans ta spera ku Boneiru ta logra dominá COVID-19.
For di djaluna 22 di febrüari profeshonal di kuido i hende di 60 aña bai ariba por registrá pa tuma bakunashon. Espektativa ta ku na fin di e siman aki tur personal di kuido a haña e promé di e dos anguanan di e bakuna di Pfizer. For di djaluna 1 di mart por bakuná hende di 60 aña bai ariba na Sentro Deportivo Jorge Nicolaas na Playa. Riba djárason 3 di mart hende di 60 aña bai ariba por laga bakuná nan mes na Cocari na Rincon
