Diamars 16 di february Prome Minister Evelyn Wever – Croes tabata na aeropuerto pa presencia e yegada di vacunanan. Esaki, Prome Minister a expresa, ta un siman cu hopi speransa. Cu yegada di e prome 11 mil vacuna, ta crea perspectivanan y etapa nobo pa Aruba despues cu 11 luna pasa Aruba a cay den e gara di Coronavirus. Awor porfin por cuminsa traha na recuperacion di nos Pais.
Premier Wever – Croes ta haci yamada na comunidad di Aruba awor cu e vacunanan tey, pa tur persona cu no a registra ainda pa porfabor haci esaki. Y si tin cualkier hende cu ainda ta den duda, ta conseha pa consulta cu dokter pa papia di tur e preocupacionnan cu tin.
“Den caso cu bo ta un persona cu no kier vacuna, ta respeta esey. Pero respeta tambe cu nos meta ta pa recupera nos pais bek. Ta hopi hende ta sufriendo na man di Corona Virus y aworaki ta momento pa cuminsa pensa riba recuperacion di nos Pais.
Aruba mester di bo. Pa esnan cu no a registra ainda, por fabor registra na e app Aruba Health. Unico cos cu bo tin mester ta bo number di AZV y den algun minuut bo ta cla.
“Ami a consulta mi dokter y el’a conseha mi pa tuma e vacuna. Cu e vacuna nos por cuminsa pensa realmente riba reconstrui nos pais economicamente. Aruba ta conta cu bo. Ami tambe ta vacuna, pasobra mi ta stima mi mes, mi ta stima mi famia y mi ta stima Aruba”, Prome Minister a expresa.
Registra, pa bo por wordo vacuna contra COVID-19!
Download e app Aruba Health; http://aruba.dvgapp.org
