No ta un sekreto ku pa hopi aña kaba digitalisashon di nos sistema di enseñansa ta un di e prioridat pa por konektá ku desaroyonan mundial den enseñansa pero tambe ku e hóbennan den e mundu sofistiká aki.
Resientemente gobièrnu di Kòrsou den kuadro di e akuerdo polítiko ku Hulanda a logra 60 mion pa atendé ku e infrastruktura di skolnan i tambe e infrastruktura pa digitalisashon. For di 2017 gobièrnu a aloká sèn riba kapitaal dienst pa e trayekto di digitalisashon na skolnan por kuminsá. Parlamentario mr. Giselle Mc William pa Frakshon di MAN a keda sorprendí ku e deklarashon siman pasa direktivanan di skol a trese a lanta e preokupashon pa ku digitalisashon ku proyekto no a keda aselerá manera a pidi for di 2018. E pandemia di Covid19 a mustra nos riba e importansia di tin nos material, lèsnan i infrastruktura di forma digital pa asina por sigui kontinuá ku desaroyo di nos muchanan pero tambe pa hasi e distansia entre e muchanan i nos sistema di enseñansa mas chikí.
Digitalishon na skolnan segun Parlamentario mr. Giselle Mc William tin diferente trayekto ku ta dependé di direktiva di skolnan i Gobièrnu. Importante ta pa skolnan mes kuminsá krea nan entidat digital ( websait, social media) pero tambe kambia e mindset di dosentenan, alumnonan i mayornan. E parti di kapasitá nos dosentenan ku e konosementu adekuá pa por enkaminá e trayekto di digitalisashon aki ta sumamente importante.
Den kuadro di esaki sra Mc William ta hasi Minister Croes e siguiente preguntanan:
- Kiko ta e motibu ku akuerdo firma na 2017 di digitalisashon no a keda konkretisá ahinda?
- Kiko ta e motibu ku no a aselerá e proseso aki?
- Kua organisashon ta enkargá pa trèk e proyekto di digitalisashon aki for di digitalisashon di kontenido te kapasitashon i guia na dosentenan?
