Timnan di personal médiko i no médiko ta kla pará pa for di 22 di febrüari kuminsá bakuná mas o ménos 600 profeshonal den kuido. Siman pasá miembronan di e timnan a terminá un entrenamentu ku éksito ku Fundashon Mariadal i departamento di Salubridat Públiko a organisá. For di djaluna promé di mart 2021 ta bai usa e timnan pa bakuná hendenan riba 60 aña.
Den e timnan médiko tin enfermera, asistente di dòkter, asistente di botikario i dòkter eksperensiá. E tim no médiko ta konsistí di kolaboradó atministrativo, anfitrion i trahadó di seguridat. Durante e entrenamentu, e miembronan di tim a repasá paso pa paso loke ta spera di nan durante bakunashon. E asistentenan di botikario i enfermeronan ta prepará e bakuna. Enfermeranan i asistentenan di dòkter ta sòru pa bakunashon. Na e sitio di prekmentu semper tin un dòkter presente pa supervishon. Enfermeranan Militza Janga-Donata, Audri Statie-Torres i Anicella Thodé di Fundashon Mariadal a entrená e personal médiko.
E kolaboradónan atministrativo a praktiká den e entrenamentu kon mester registrá hendenan i tambe kon prosesá esnan ku a registrá. Ku e anfitrionnan a mira kon nan tin ku risibí i guia hendenan. E personanan di seguridat a haña splikashon kiko nan mester hasi pa pèrkurá ku tur kos ta kana seif i segun regla.
Ta bakuná e personal den kuido na Fundashon Mariadal. Ta bakuná sobrá di poblashon na Kompleho Deportivo Jorge Nicolaas na Kaya Amsterdam òf Fundashon Cocari na Rincon. Fundashon Mariadal i Salubridat Públiko a kuminsá ku entrenamentu di e timnan na prinsipio di febrüari.
