Armand Hessels: Aki shete luna e di dies elecshon desde Status Aparte lo tuma luga

Aki shete luna e di dies elecshon desde Status Aparte lo tuma luga. Awor normalmente ta e tempo cu partido politico ta core tras di candidato popular cu por hala hopi voto. Eseynan na nan turno ta negosha nan posishon riba lista y/of un funcshon di ministro. Ta di spera cu e consecuencianan di e pandemia di covid lo percura cu e grado carnavalesco di elecshon e aña aki lo ta minimal y cu lo tin mas atenshon pa realidad. Pasobra esaki ta pone exigencia cada bes mas pisa na ‘politica’. E ultimo aki lo recorda ‘e bon tempo di antes’ cu nostalgia.

Ajooo antaño

E partidonan cu a goberna alternativamente, pa decada a sinti nan mes sosteni pa apoyo electoral masal, cu supuestamente lo a duna nan conducta un base legitimo. Nan a kere eroneamente di ta doño di nos pais y a ‘administra’ su pertenencianan como si fuera tawata nan propiedad personal di cual nan por a dispone libremente. Puesto, tereno y proyecto a haya nan destino pa un grupito di famia y fanatico di partido. Mayoria parti di comunidad di Aruba a keda man bashi.

Awor cu no por parti puesto mas, y asta ta bay perdi mientras cu personal mester entrega, tereno ta hopi menos disponible y proyecto ta keda drumi, ta di spera cu e coremento tras di privilegio lo yega su fin. E atracshon di partido politico como posibel loteria cu lo cumpli cu deseo di votador exigente lo yega su fin. Awor e partidonan ey ta confronta e consecuencianan di nan actonan cu mester deshaci den tempo corto pa duna nos pais y su poblashon e posibilidad pa recuperashon.

Realidad crudo

Segun e cifranan mas reciente di Departamento di Finansas, e situashon financiero no ta nada alentador:

Den esaki no ta inclui (!) e debenan di PPP di en total casi Afl. 1 biyon, cu ta costa nos Afl. 80 miyon pa aña duranta dos decada.

Cu fayo y debe di tal indole, y entrada cu por lo pronto lo ta hopi insuficiente, gobierno no por haci nada otro cu obligatoriamente ehecuta recomendashon ‘bieu’ pa baha gasto. Specialmente riba tereno di personal, como gasto di mas grandi. Sigui nenga esey lo ta un obstaculo grandi pa recuperashon. Lamentablemente nos gobiernonan nunca a ocupa nan mes cu e pregunta pa crea un red social. Esaki ta necesario pa flexibilisa e mercado laboral, cu sa menshona como condishon pa un economia resistente. Y asina tin hopi otro asunto cu gobierno a laga di solushona, pero cu awor ta urgente pa ehecuta concretamente. E pregunta ta si partido politico tin e conocemento, curashi y apoyo necesario pa awor sí realisa tur e reformanan necesario cu nan a neglisha/obstaculisa pa tanto aña.

Alternativa

No ta por nada cu cada bes mas hende ta boga pa un ‘zakenkabinet’. Esey lo tuma acshon ‘sin priviligia persona’ cu ta necesario pa pone nos pais riba pia atrobe. Ya caba gobierno di MEP, hopi aña pasa, a inicia un initiativa asina. Esey a faya despues di declarashon di e lider di e tempo ey cu “e zakenkabinet mester drecha e situashon pa despues ‘politica’ tuma over atrobe”. Tur esnan envolvi a gradici pa e ‘honor’ ey. Pero awor e situashon ta hopi pio y consecuentemente e necesidad pa ‘drecha e situashon’ y pa duna e partnernan social participashon real den esey, ta hopi mas grandi.

Ta di spera cu e ‘Encuesta tocante e percepshon di integridad’ di Banco Central ta expone bon cla na partido politico cu ‘publico’ ta desconfia nan masha. Esey ta un base hopi malo pa traha. Pesey ta inevitable pa entama un discushon publico tocante un sistema politico nobo cu ta elimina patronahe politico y ta duna mas garantia pa gobernashon integro, un miho funcshonamento di e sistema di checks & balances, y participashon di ciudadano. ESEY ta duna ciudadano e confiansa necesario y e curashi pa aporta na un recuperashon duradero!