Konsehal Daisy Coffie di Frakshon Coffie a manda un karta pa presidente di Komishon Fiho di COVID-19 sr Clark Abraham, kaminda sra Coffie ta trese dilanti ku dia 17 awor lo trata e maneho relashoná ku Covid-19 teniendo na kuenta e sirkunstansianan manera esakinan ta desaroyando den komunidat boneriano. ‘Miéntras ku korektamente ta hinka tur energía den kuido di nos salú públiko i alabes ta buskando fórmulanan i alternativanan pa e bida diario sosial-ekonómiko keda drai mas normal posibel, ketu bai mi ta sinti falta di atenshon pa loke ta efektonan riba e salú mental di nos komunidat. Un di e formanan pa atendé ku esaki por ta promoshon di aktividatnan ku ta distraé e mente. Tin diferente forma pa promové aktividatnan di distraishon, manera landamentu, kanamentu den nos naturaleza i hasi rekorido rònt Boneiru pa konosé nos isla. Tur ta aktividatnan ku lo por hasi den sírkulo kontrolá di kantidat di hende. Por promové shownan musikal na televishon, gameshownan na televishon ets i hopi otro ku nos kreatividat mental por krea’, segun konsehal Daisy Coffie.
Deporte
Den su karta Daisy Coffie ta splika ku un di e dibertishonnan di nos hendenan ta praktiká deporte. E deportenan mas aktivo aktualmente riba nos isla ta sòftbòl, futbòl, biljart, bolas i domino. Ku eksepshon di biljart i domino e otronan ta deporte ku ta keda praktiká na aire liber. Daisy Coffie: ‘Na vários okashon mi a boga pa laga praktiká fútbòl, nos deporte rei, bou di reglanan pa evitá plamamentu di e vírùs. Kada biaha e kontesta standarte ta ku Tim di Maneho Insular ta wardando riba un plan di Federashon di Futbòl Boneriano pa evaluá e posibilidat pa praktiká e deporte aki den presensia di públiko, lokual aktualmente no ta e kaso. Na e otro un banda mi ta skucha ku dirigentenan ta deklará ku nan a entregá plan.’
Kurpa sano i mente sano
‘Pa tal rason mi a sinti e nesesidat pa Konseho Insular haña informashon di parti di esnan ku ta dirigiendo e ramonan di deporte ku mi a menshoná ariba. Mi kier a hasi un petishon na sr. presidente pa atraves di griffier invitá e dirigentenan di sòftbòl, futbòl, biljart, bolas i domino pa nos por risibí di nan banda nan plannan konkreto pa por praktiká e deportenan menshoná den presensia di públiko pero ku garantía di kuida salú di tantu esnan ku ta praktiká e deporte komo e públiko fanátiko. Meskos ku ta hasi tur esfuerzo pa nos sektor di turismo i ta apliká medidanan apropiá pa e sektor aki, mi ta kere ku a yega tempu pa nos huntu ban habri bèk práktika di deporte pa asina kontribuí na un kurpa sano i un mente sano di tantu praktikantenan komo fanátikonan’, asina konsehal Daisy Coffie a trese dilanti den su karta na sr Clark Abraham, presidente di Komishon Fiho di Covid-19.
