E tabata un momento emocionante y di orguyo ora cu ministerio di enseñansa a mira cumpli un promesa pa honra un yiu di tera. Minister di Enseñansa Armando (Rudy) Lampe a mira con e famoso pelotero Xander Bogaerts a devela e nomber nobo di su ex scol.
Commandeur Pieter Boer Basischool, situa den Jasmijnstraat, ta existi pa 75 aña. Minister di Enseñansa ta haya cu ta momento pa duna e scol aki un imagen nobo y cu esaki un cambio di nomber. “No tin un miho nomber cu esun di e gran yiu di tera y famoso pelotero Xander Bogaerts, kende ta un ex alumno di e scol,” e mandatario a bisa tempo cu el a haci e anuncio aki, algun siman atras.
Minister Lampe tabata tabatin palabra di elogio pa e studiantenan y e team cu a organisa e evento historico aki. “E cambio aki ta necesario y ta husto. E nomber Pieter Boer no ta un nomber cu ta un fuente di inspiracion pa nos muchanan, mientras cu e nomber Xander Bogaerts si ta duna inspiracion.” Pero tambe a bisa cu despues di 75 aña ta mas cu husto pa haci e cambio.
Xander Bogaerts ta un di e grandinan den Grandes Ligas , y ta un hazaña cu Aruba ta super orguyoso di esaki. “Tur dia cu e muchanan yega ta mira e nomber Xander Bogaerts. Cada un tin un soño y lesando e nomber, nan ta haya un motivacion pa sigui studia y bay dilanti. Si Xander a realisa su soño, ami tambe por”. Pa e maestronan tambe e ta un motivacion pensando “mi por haci diferencia den bida di un ser humano”. Esaki lo duna e maestronan e motivacion pa sigui haci e diferencia den cada studiante y sigui traha cu smaak pa cada mucha.”
Den su discurso e mandatario a lesa un poema di Bertol Brecht cu ta bisa lo siguiente: “Ora un hende haci bondad, durante dies aña cu rason nos ta yam’e bon hende. Si e persona ey haci bondad durante trinta aña cu rason nos ta yam’e hopi bon hende. Si el a haci bon durante henter su bida, nos lo bisa cu el a bira indispensabel pa humanidad.” Y el a bisa Xander mes cu loke el a logra, el a hacie grandi y ta un ehempel pa e muchanan. Esaki por a nota tambe ora cu e pelotero a haci su entrada y e muchanan a keda aplaudi.
El a gradici e pelotero pa su cooperacion pa cambia nomber di e scol cu awor a bira “Xander Bogaerts Basisschool”. Esaki ta un decision cu a pasa den Conseho di Minister dia 19 di januari, 2021.
E pelotero como cabesante di e scol a haya un copia di e decreto ministerial cu a aproba e cambio di nomber.
Bogaerts mes tabata yena di emocion y tabatin lagrimanan den su wowo momento cu e la duna su discurso, despues a pasa over pa kita e paña pa devela e borchi cu tin e nomber y logo nobo di e scol.
Den cuadro di e celebracion aki, e pelotero a haci un donacion di 35 mil florin pa materialnan educativo pa e scol.
