Diaranson mainta na commandeur pieterboer school tabata tin un dia hopi special pa henter e scol y tambe e muchanan. Cabesante di e scol sra. Ustelle ta sumamente contento cu e scol ta bay cuminsa cu un etapa nobo. E scol tin un buki cu yama commandeur pieterboer school y e buki aki ta bay pasa pa pasado y na unda cu e scol lo cuminsa cu un buki nobo y etapa nobo cu lo yama Xander Bogaerts School.
Na aña 1946 e scol a haya e nomber di commandeur pieterboer school. Na momento cu tabata combersa cu diferente cabesantenan di scol , e meta tabata pa busca pa sa di e nomber di pieterboer debi cu na scol mes no tin informacion di e nomber di e scol. Asina a cuminsa un investigacion pa asina busca e rais di kico e nomber di e scol tabata significa.
A cana e caminda na Biblioteca Nacional y na momento cu a yega na un informacion cu e nomber no ta aparece riba e lista di nombernan di e commandeurnan cu a yega di traha na Aruba. Tambe loke cu por a saca afo cu e mr . Pieterboer no ta existi mes, esaki tabata un sorpresa pa e director di scol.
Asina e curiosidad pa a sigui busca a keda y a bin riba un otro buki cu un mr bosch a skirbi di Aruba y den su buki e tabata papia di un commandeur cu tabata yama pieterboer, pero cu e persona ey tabata uno cu no tabata mucho bon debi cu su manera di trata e indiannan di antes no tabata bunita y tabata haci actonan manera mara nan na cadushi .
Esaki a indica cu e personahe Pieterboer no tabata un bon ehempel pa tin un nomber pa un scol. Di e manera aki a dicidi di trece e storia aki dilanti pa tur esunnan concerni y mirando e storia cu tin tras di e nomber di commandeur pieterboer school a cuminsa cu e proceso pa pensa un nomber.
Pensando riba diferente nomber a bin pensa riba Xander Bogaerts y asina a bay mira den tur e potretnan di antes di e scol y a bin encontra e potret di Xander cu tabata un alumno di e scol den pasado. Asina tur hende a keda contento y cu tur hende a bay diacuerdo pa cambia e nomber pa Xander Bogaerts School.
Despues cu e director di e scol a hiba palabra Xander Bogaerts tambe a hiba palabra , manera semper Xander Bogaerts un hoben cu hopi disciplina y hopi timido cu su curason den man a hiba palabra. Xander Bogaerts ta hopi contento y pa su persona tabata un honor pa por tuma e reconocemento aki. Xander Bogaerts a recorda tur su docentenan y e tabata un momento hopi emocional pa e pelotero profecional.
Sinembargo e tabata bon cla cu na momento cu e tabata chikito su deseo tabata di bira dos cos, sea ta un basebolista profecional of un meneer di scol. Xander Bogaerts ta un yiu morocho y semper e cu su ruman tabata train hunto hunto cu su tio unda cu e la yuda nan for di chikito y e ta sumamente gradicido na su tio cu a yudele pa por a logra di tur loke e la logra den su bida te na e momentonan aki.
Su famia ta hopi importante pe, principalmente su mama cu a lanta e y su ruman como un mama soltera unda cu presencia di su tata no tabata tey, pero su mama Sandra Brown a dedica su mes na su yiunan y lanta cada un di nan cu hopi disciplina y amor.
Xander Bogaerts te cu dia di awe tur loke cu e la logra den su carera e no por a imagina y pa awe cu 28 aña tin un scol na su nomber y e ta gradici DIOS na prome luga y tambe tur esunnan cu tabata di un manera of otro parti di su formacion, na henter su famia cu a kere den dje y sostene.
Tambe Xander Bogaerts a duna un conseho na cada hoben cu awor cu nan ta chikito pa nan sa kico ta loke nan kier bira ora cu nan bira grandi. E no mester ta un basebolista e por ta cua funcion cu bo ta desea , pero importante ta pa bo sa unda bo curason ta y sa kico ta loke bo kier bira ora bo bira grandi y focus riba bo meta.
No laga ningun hende bisa boso como mucha cu boso no por, esey ta palabra nan cu no ta conta. Tambe Xander Bogaerts a duna e conseho na cada mucha pa nan wak bon kende ta nan amigonan pa keda den bon caminda y haci decisionnan mas correcto. Xander Bogaerts su mes tabata gusta scol hopi. Na momento cu e la caba scol e la dicidi di sigui focus den baseball y e cu su ruman di chikito nan soño tabata pa yega den grandes ligas. Sinembargo riba e mes un caminda tur dos a pusha otro pa yuda otro pa por logra nan meta.
Xander Bogaerts na e mes un momento a haci donacion di 35 mil florin na e scol y tambe a haci entrega di un uniform cu su firma na Minister di enseñansa cu tambe tabata presente y tabata sumamente orguyoso di Xander Bogaerts.
