Boneiru mester di un haf di karga nobo? E pregunta aki Kolegio Ehekutivo i ministerio ta hasi for di 2016 i awor nan ke bai investigá esaki mas aleu.
For di basta aña kaba ekonomia di Boneiru ta kresiendo. Konsekuensia ta ku kada bes mester importá mas merkansia. Pa esaki infrastruktura riba hopi tereno no ta sufisiente. Esaki ta konta sigur tambe pa infrastruktura di haf. Ya pa algun aña kaba Kolegio Ehekutivo huntu ku ministerio di Infrastruktura i Maneho di Awa ta trahando riba mehorashon di esaki. Por ehèmpel na aña 2018 a renobá Waf Nello Craane (waf di sùit) na Playa kompletamente i tambe e Waf di Meimei ku ta mas chikitu nan a hasi adekuado pa por deskargá e barkunan di Don Andres. Aktualmente nan ta ekstendé Waf Nello Craane pa por laga barku krusero mara na un manera seif i pa por laga e pasaheronan abordá i desembarká sin problema.
Infrastruktura di haf duradero pa futuro
Pa por disponé di un infrastruktura di haf ku ta duradero pa futuro i ku ta krese ku desaroyonan tin mester di mas. Un kombinashon di nabegashon krusero i atendementu ku karga no ta optimal, pa motibu ku kada tipo di karga mester di otro fasilidat. Por ehèmpel pa deskargá barku di kònteiner tin mester di un kran di haf ku no por instalá riba Waf Nello Craane manera e ta aktualmente. Tambe e tráfiko di karga ku ta bai den direkshon di waf òf ku ta bandoná waf i ku mas i mas ta oumentando, ta hañ’é den pèrtá ku e sobrá tráfiko den e parti mas drùk di Playa. Separashon di e fluhonan di tráfiko aki i mehorashon di e atendementu ku merkansia ta un di e metanan di Kolegio Ehekutivo i ministerio di Infrastruktura i Maneho di Awa. Un haf di karga nobo lo por ta e solushon.
Preis mas abou pa konsumidó
Un haf di karga ta hasi posibel ku direktamente por risibí barku di kònteiner for di Oropa, Suramérika i Merka. Di e manera aki no tin mester di hiba kònteinernan Kòrsou promé, loke ta hasi ku gastu di transporte di merkansia pa Boneiru por baha. ‘Pa motibu ku barkunan di kònteiner por yega Boneiru direktamente, preis pa konsumidó por baha i esaki ta di gran importansia pa nos poblashon’, segun diputado Thielman di Desaroyo Ekonómiko.
Posibel ubikashon
Un ubikashon adekuá pa un posibel haf di karga nobo ta WEB na Hato. Na aña 2017 kaba Kolegio Ehekutivo a indiká esaki komo ubikashon di preferensia pa un haf di karga nobo. E dos argumentonan mas importante pa esaki ta: un klima di ola trankil pa motibu ku e ta situá den un kurva di nos isla i protehé pa Klein Bonaire i na e ubikashon aki ya kaba tin aktividat industrial establesé, manera e instalashon di awa di bebe di WEB i tankinan di almasenahe di Curoil. Pa e haf mester ahustá e plan di destinashon.
Investigashon pa loke ta trata faktibilidat finansiero i ekonómiko
Huntu ku ministerio di Infrastruktura i Maneho di Awa Kolegio Ehekutivo a duna enkargo pa investigá e faktibilidat finansiero i ekonómiko di un haf nobo. E di dos paso lo ta pa investigá di ki manera konhuntamente por finansiá e haf nobo. Entre otro lo traha un Raportahe di Efekto riba Medio Ambiente (Milieu Effect Rapportage – MER).
Diálogo ku poblashon
Pa loke ta trata e Raportahe di Efekto riba Medio Ambiente (MER) e diálogo ku e alrededor, interesadonan i organisashonnan di naturalesa ta okupá un lugá importante. Poblashon i organisashonnan di interes ta haña oportunidat pa ekspresá nan mes tokante un haf di karga nobo. Gezaghèber Rijna: ‘Na mi opinion e haf nobo ta un paso grandi padilanti pa Boneiru, pero sigur mes importante ta ku e proseso aki ta kana hopi kuidadosamente, ku frankesa i den bon diálogo ku nos poblashon. Nos tin ku papia ku otro tokante e benefisionan i e difikultatnan.’
