Conforme e stipulacion den ley, Camara di Comercio y Industria (KvK) ta representa comercio y industria di Aruba. E directiva di KvK, cu ta consisti di 9 miembro, ta wordo elegi door di representantenan di negoshinan grandi “grootbedrijf” como tambe di negoshinan chikito “kleinbedrijf”. Den e prome reunion di directiva di KvK e miembronan ta elegi un presidente y un vice-presidente pa e aña actual. Alabes ta keda determina cual miembro lo fungi como e presidente suplente. E presidente y vice-presidente, hunto cu e secretario/director ehecutivo, ta forma e directiva diario di KvK.
Pa aña 2021, e directiva di KvK ta consisti di sr. Omar Tromp como presidente, sra. Wanda Broeksema como vice-presidente y demas miembronan sra. Monica Kock, sra. Sandy Odor, sr. Daniele Ferrara, sr. Gerardus (Geert) Weber y sr. August (Anthony) Croes cu lo fungi tambe como presidente suplente den caso cu e presidente of e vice-presidente ta ausente. E directiva ta conta cu dos miembro nobo den persona di sr. Eugene Farro y sr. Diederik Kemmerling.
E directiva di KvK ta encarga cu e maneho y strategia di e organisacion, cu asistencia di e secretario/director ehecutivo, sr. Martijn Balkestein kende alabes hunto cu e personal di KvK ta percura pa e funcionamento y actividadnan diario di KvK.
KvK ta premira cu e añanan benidero nos lo sigui sinti e efectonan di e pandemia y cu henter nos comunidad, specialmente nos comerciantenan y nos gobierno, lo wordo confonta cu diferente retonan adicional. Pa por yega na un recuperacion di nos economia y stabilidad social, mester haci varios reforma y tuma accion urgentemente, caminda cu ta sumamente importante pa tur stakeholders traha huntu cu e interes comun di supera e situacion dificil aki cu ainda nos ta confrontando y crea un miho porvenir cu ta duradero y sostenibel.
Directiva di KvK ta dispuesto pa sigui duna su aporte y lo keda boga pa tin mas dialogo entre gobierno y e sector priva pa asina conhuntamente por atende e diferente puntonan di atencion y di preocupacion di e sector comercial. KvK lo percura pa ta mas activo e aña aki y lo organisa diferente actividadnan pa ricibi feedback di nos empresarionan y tambe pa KvK por comparti informacion y experticio.
