Despues di mas cu 6 luna den un lucha pa habri un cuenta di banco, awe Otmar Oduber y Bochincha a haya rason den corte. Corte a ordena banco pa habri e cuenta den un dia di tempo.
Corte a dicidi cu e demanda di Otmar Oduber y Bochincha Container Yard tin base pa cual a bini cu un decision unda ta ordena e banco pa coopera cu e dos partidonan aki.
Oduber a dicidi pa cuminsa un caso pasobra Aruba Bank semper tabata su banco y di su famia y nan no kier a habri un cuenta pa su negoshi cual e mester di dje pa su operacionnan diario. Manera e abogado a bisa, su cliente no por cana of tin saco di placa den su poder ya cu esaki ta ubn peligro grandi pe y su famia.
Hues den su sentencia ta bisa cu e banco a bisa cu e tin e derecho pa dicidi si e ta habri un cuenta of no cu BCY y Otmar Oduber. Corte ta di acuerdo cu nan, pero e no por tuma e decision aki pasobra tin indicacionnan cu tin, den e caso aki di corupcion, No. Hues a bisa cu si e banco haci esaki, tuma un decision a base di esey, anto e ta actuando inhusto cu Oduber y e negoshi. Solamente cu Oduber ta un sospechoso, sin cu el a wordo condena, no ta motibo hustifica y di peso.
Banco a bisa cu nan tin miedo cu e escandalo rond di Oduber lo por tin of duna nan un mal reputacion door di nan aliansa cune. Mester tene cuenta, e banco a bisa cu Otmar Oduber ta bou investigacion pa su actuacion tempo e tabata minister. Pero e caso aki no ta cera ainda y ni tabatin un huicio. .
E splicacion di banco cu e negoshi manera Bochcincha ta anda cu hopi placa efectivo cu nan no por controla, ta algo cu Corte no por compronde. Y a duna e ehempel cu tin negoshinan manera supermercado y otro negoshinan den HORECA tambe ta haya hopi placa cash y no ta kere cu banco a keda sin habri cuenta pa nan. Banda di esaki, no mester lubida cu aki na Aruba pago cu placa cash ta legal. Ademas obligando Oduber cana cu hopi placa casha, ta hustamente loke ta bay haci e asunto sospechoso.
Corte a bisa cu den e caso aki e mester pone den balansa interes di ambos partido y den esaki e necesidad di Bochincha pa haya un cuenta di banco cu por haci su operacion mas sigur, a pisa mas.
Hues a ordena banco pa habri un cuenta pa Bochincha prome cu diahuebs merdia, sino nan ta core e riesgo di haya un boet di 2500 florin pa cada dia.
