Despues di casi 4 aña un di e boortoren para dilanti Aruba ta preparando pa bandona e teritorio y bay cuminsa cu un proyecto nobo.
Ta trata aki di Maersk Valiant cu a yega Aruba na 2017, procedente di Golfo di Mexico.
Despues di a custumbra pa hopi tempo cu bista di e Plataforma aki, por a nota cu recientemente a cambia di posicion. Mesora a cuminsa hopi speculacion si tin un Proyecto di exploracion ta bay cuminsa na costa di Aruba. Pero a bin tende cu esaki lo no ta e caso.
E Plataforma aki, cu ta nabega bou bandera Singapore, ta bay move direccion di Surnam unda cu tin un proyecto grandi andando.
Ademas di e Plataforma aki, por mira tambe pazuid di Aruba dos mas cualnan ta West Capricorn y Seven Brasil, cualnan tambe tin basta tempo staciona den e area ey.
Normalmente e Plataforma ta keda eynan en espera di contractonan nobo.
Directie Scheepvaart Aruba (DSA), cu ta maneha e area aki, ta un departamento gubernamental y ta resorta bou di e Minister encarga cu Transporte. DSA ta responsabel pa prepara y implementa leynan maritimo pa asina garantisa e siguridad di e trafico maritimo den nos awa nan territorial.
Na april 2015, e Decreto Nacional cu ta stipula tarifa pa cierto actividadnan tuma luga den areanan designa den nos awa nan teritorial (LB ham tarieven en vergoedingen redegebieden) a drenta na vigor. A base di e Decreto Nacional aki por cobra ademas di ancra so tambe pa actividadnan di mantencion, transshipment y bunkering cu ta tuma luga den nos awanan territorial. Tur fondo ta destina pa pais Aruba. E Ordenanza Nacional cu ta regula tur actividad cu ta tuma luga den nos awanan territorial a drenta na vigor na aña 2012. Ta trata aki di e Haven-en Redeverordening.
Aruba ta e unico isla den henter Caribe cu tin un area di Transshipment y un area di Mantencion designa. E areanan aki ta reconoci internacionalmente y ta poni riba mapa nautico. E area di Transshipment ta menos profundo y relativamente trankil. E area aki ta worde uza pa barconan cu ta ancra y tambe door di barconan cu ta translada carga di un barco pa otro. E area di Mantencion ta worde uza pa barconan cu mester haci reparacion y/of inspeccion.
