Parlamentario pa fraccion di AVP, sr Robert Candelaria, a mustra durante conferncia di prensa cu ultimamente por a tuma nota cu e mesun man cu Gobierno ta corta gasto cune, e ta bira tuma mas hende den servicio di gobierno.
Candelaria a mustra cu di un banda ta gaba c’un Minister ta ‘bezuinig’ miyones den enseñanza pero di otro banda, e mesun gobierno ta bira y tuma mas hende den servicio.
“Gobierno aki no sa unda mester reduci gasto y unda mester inverti y ningun gobierno mester haci’e un prioridad pa reduci gasto den enseñanza y tampoco ningun gobierno no mester reduci gasto den su frontliners den un pandemia.
E gobierno actual ta haciendo esey pero na mes momento ta tumando hende den servicio caminda cu no tin mester, simplemente pa retene nan hendenan cerca nan.”
Parlamentario Candelaria a sigui mustra cu diaranson un grupo di 15 organisacion y profesional den e sector medico, a manda un carta habri pa Parlamento y Gobierno haciendo un apelacion urgente pa cambio den e mundo medico.
E carta ta firma dor di Stichting ziekenverpleging Aruba, director di Imsam, Director di Respaldo, director di SABA, voorzitter asociación di dokternan di cas, voorzitter di asociación di specialistanan, secretario di asociación di boticanan, voorzitter di asociación di fisioterapeutanan, asosacion di specialistanan di hospital, voorzitter Aruba dental society, voorzitter di asosacion di parteranan, director di Laboratorio di servicio, voorzitter di Vereniging apothekers Aruba, voorzitter di asosacion di specialistanan den loondienst y por ultimo e voorzitter di e Arubaanse Bond voor verpleegkundigen.
“Esaki claramente no ta un stunt político pero un ‘cry for help’ di nos mundo medico, cu desde inicio di AZV, a pasa den hopi rond di reduccion di gasto y mehoracion di eficiencia y cu awor ta e miho den nos region. Semper por miho pero loke nos tin ta di un calidad halto y na un prijs pagabel.
Den tempo di un pandemia loke mas un gobierno mester cuida ta su frontliners, ta nan mester ehecuta maneho y ta nan ta cara, man y wowo di gobierno pa combatí e pandemia.
Un di e gruponan primordial den nos frontliners pa deal cu e pandemia ta nos tremendo profesionalnan den e sector medico, di dokternan di cas, pa enfermeronan, pa specialistanan y boticanan y tur nan empleadonan.
Pero loke nos ta mirando, ta cu hustamente e frontliners ta gritando mas duro pa tene cuenta cu nan y nan dolornan pero ta di lamenta cu gobierno tabata pa bay corta den nan sector di inicio y esaki no ta gobierno Hulandes a pidi pa esey.”
Parlamentario Robert Candelaria a sigui mustra cu dia 19 di mei 2020, Staatssecretaris Knops ta bisa Tweede Kamer:
“Aanvullend geldt als voorwaarde dat Aruba voor 1 juni de reeds op de plank liggende kostenverlagende maatregelen in de gezondheidszorg implementeert, waardoor er maandelijkse AWG 5 miljoen kan worden bespaard op de Algemene Ziektekosten Verzekering (AZV).”
“Op de plank liggen” ta nifica cu e plan tabata existi caba y awor Hulanda a djis bay di acuerdo pa ehecuta esaki y ora cu a bin pregunta pa clarificacion di esaki den Tweede Kamer, Knops a indica dia 27 di oct 2020 cu gobierno di Aruba a laga PWC hasi un investigacion.
Den e rapport ey ta papia di e reduccion di gasto di 5 miyon pa luna, pues ta aki mes a inicia e proceso pa corta den gasto di AZV.
Awor Hulanda a acepta esaki si y Knops a bisa Tweede Kamer cu: “De wijze waarop Aruba de taakstelling invult is een lokale verantwoordelijkheid”, pues gobierno tin e espacio pa nan mes wak con ta deal cu e reduccion aki, pues na unda tin cu corta y nos tur por mira con nan a haci’e, esta corta den AZV.
Firmantenan di e carta menciona di nos mediconan ta bisa cu nos hendenan den e sector medico ta esunnan cu ta cobra menos den henter Reino y awor cu Gabinete Wever Croes ta sigui reduci gastonan den e sector aki, netamente den tempo di pandemia, ta pone cu nos profesionalnan por hasta bandona Aruba pa busca miho condicionnan pa nan mes y nan famia.
Esaki lo nifica cu mester manda mas hende afo pasobra tin menos medico aki pa duna servicio adecuado y tur luga na mundo y den Reino ta para brasa habri pa ricibi profesionalnan medico aki” Parlamentario Robert Candelaria a declara
