Aki 10 aña Kòrsou lo mester tin un ròl prominente riba e tereno di energia duradero, i aki 20 aña nos mester ta un eksportadó di energia renobabel den e region di Karibe. Pa por logra e ambishon aki, ta bini un ‘Living Lab’, den kual Gobièrnu di Kòrsou, diferente kompania lokal i Universidat di Kòrsou ta bai traha huntu ku TNO i empresanan Hulandes.
Djaweps 14 yanüari 2020, partidonan a djoin di forma virtual pa ankra e kolaborashon aki pa medio di un deklarashon konhunto. Kada un di e kompanianan ku ta forma parti di e inisiativa aki tin e prinsipio di durabilidat haltu riba nan agènda. E kompanianan i instansianan di Kòrsou ku lo forma parti di e aliansa ta Refineria di Kòrsou (RdK), Aqualectra, Selikor i ABC busbedrijf i nos Universidat di Kòrsou komo instituto di konosementu i investigashon. For di Hulanda ta forma parti di e kolaborashon: Kompania di Haf di Rotterdam, Damen Ships, Kompania Teknológiko ‘VDL groep’, Kompania di depósito ‘Vopak’, i kompanianan di Offshore ‘Van Oord’.
Impulsonan ekonómiko nobo i kadenanan duradero
Gobièrnu di Kòrsou i TNO a firma un konbenio den 2018 na e promé Bon Bini for Business i ya ta trahando huntu pa mas ku 2 aña, realisando diferente investigashon i proye pa aselerá inovashonnan riba e tereno di mobilidat duradero i energia. Resientemente TNO a traha un análisis pa Refineria di Kòrsou tokante e posibel pasonan di transishon den futuro serkano. E refineria ta, pa mas di 100 aña, un doño di trabou importante i fuente di entrada pa Kòrsou. Banda di modernisashon di fasilidatnan petrolero, meta ta pa riba término largo desaroyá mas aktividatnan, produktonan i industrianan inovativo ku bista riba un futuro duradero. Pa Kòrsou, ta trata aki di un kombinashon di durabilidat, impulsonan ekonómiko nobo i akumulá èkstra konosementu. Por pensa riba organisashon di kadenanan duradero i integral, for di e momentu ku e inovashonnan keda generá te na e trayekto di kombershon i almasenahe, siguí pa distribushon i benta. Asina por ehèmpel, transporte ku bùsnan eléktriko riba nos isla lo no bira un solushon lòs riba su kurpa, pero mas bien parti di un kadena kaminda tambe ta integrá energia solar i oumento di kapasidat di bateria. Esaki, al final, lo mester sigui krese i bira un ehèmpel di sistema di kadenanan duradero ku ta inkluí entre otro energia sostenibel, produkshon di hidrógeno, kargadónan di energia sintétiko, elektrifikashon, depósito, dekarbonashon di e refineria, bio-kombustibel, i stashonnan di rekargá.
‘Triple helix’: Konosementu, Empresanan, Gobièrnu
Korsou komo ‘Living Lab’ lo mester bira un sistema ekológiko habrí, kaminda por proba inovashonnan riba eskala chikitu. E ‘‘Living Lab’ ta konsistí di un programa kolaborativo di investigashon i desaroyo, pa por hasi e transishon pa un pais i ekonomia duradero mas konkreto. For di inisio, e asina yamá ‘proeftuin’ aki a keda sostené pa tantu Gobièrnu di Kòrsou, en espesial Ministerio di Asuntunan General, Desaroyo Ekonomiko i Trafiko, Transporte, i Planifikashon Urbano, komo tambe ministerionan di Hulanda di Economische Zaken, Binnenlandse Zaken en Konkrijksrelaties & Defensie, i instansianan NLWorks i Rijksdienst voor Ondernemend Nederland (RVO). Fruta di e kolaborashon ku a inisia na 2018 ta ku awor ta krea un aliansa amplio i historiko kaminda Kòrsou por fungi komo sentro di inovashon ku lo por kondusi den futuro na atrae mas invershonista, instansianan akademiko, pero tambe na eksportashon di konosementu for di Korsou pa region i mundu.
Inovahon rápido i eskalashon
E idea tras di esaki ta ku e strategia i ideanan ku nos usa na Kòrsou den e kadena di inovashon, danki na e gran potensial di energia di bientu i solar, por keda desaroyá i implementá tambe pa henter e region di Karibe, Hulanda i otro partinan di mundu.
Pa medio di e ‘Living Lab’ lo tin un interkambio kontinuo di ideanan i konosementu entre Kòrsou i Hulanda. Danki na esaki, kompanianan lokal envolví ta ekspandé nan merkado den e region, i ta desaroyá produktonan di eksportashon nobo pa merkado Hulandes i internashonal.
Gobièrnu di Kòrsou ta sumamente kontentu ku e avansenan i e koperashon históriko aki i entre nos kompanianan lokal i entre paisnan Kòrsou i Hulanda. Gobiernu ta yama Bon Bini na e kompanianan hulandes ku lo forma parti di e aliansa i ta orguyoso di nos kompanianan lokal RdK, ABC busbedrijf, Aqualectra i Selikor pa nan liderasgo den krea un futuro i bienestar mas duradero i prospero pa nos pais.
