Na aña 2018, Unicef Hulanda a ehecuta un analysis social di e situacion na Aruba. Di e analysis aki a ser presenta diferente aspectonan y puntonan cardinal den nos sistema cu lo mester bin cambio. A base di e resultadonan aki Sociaal Crisis Plan (SCP) su programa a wordo structura pa asina bin cu solucion pa cu e puntonan cardinal aki y asina mehora nos sistema di proteccion di mucha y hoben aki na Aruba.
Norma y Balor
Unicef a indica cu tin entre otro un gran demanda na cambio den norma y balornan den con nos ta lanta nos yuinan. Como mayor nos ta resorta hopi biaha na uzo di violencia pa corehi nos yuinan. SCP ta traha conhuntamente cu Comision Vision Pedagogico pa introduci un programa di e “6- bouwstenen” cu ta enfoca riba lantamento di mucha.
Falta di datos
A word indica cu tin falta di datos concreto y confiabel den e sector social. Sociaal Crisis Plan ta actualmente den su etapa final pa por introduci un “Centraal Registratie Systeem” cu lo fungi como un “database central” den e sectornan concerni. Alabes a haci uzo di resultadonan di diferente estudio cu wordo ehecuta den e sector social door di academiconan profesional di Aruba.
Guia na mayornan y hoben
A indica cu mayornan y famianan directo di muchanan cu problema di conducto tin mester di guia y ayudo. Sociaal Crisis Plan a habri na 2020 e Centro pa Hoben y Famia, un centro multidisciplinario unda ta duna ayudo y guia na mayornan, famia, educadornan y hoben cu ta encontra cualquier problema. E centro aki ta ofrece ayudo di diferente instancia den e cuadro preventivo bou di un solo dak na nos comunidad, .
Detecta abuso di menor
A señala cu tin mester di leynan pa obliga cu abuso di menor ta wordo señala y para na tempo. Sociaal Crisis Plan a drecha y refina e Ley di Creche y ta den e trayecto final pa introduci e Ley di Codigo di Proteccion den 4 sector: Social, Enseñansa, Hudicial y Salubridad Publico. E aña aki, 2021, e Departamento pa Mucha y Hoben lo bira un realidad caminda Inspectoria Social lo bay enforsa y controla e maneho pa cu e Leynan den e sectornan concerni.
Locual cu nos no por descarta ta e echo cu e analysis aki tambe a trece pa dilanti e gran negligencia cu e sector social a experiencia den e añanan anterior, cu a resulta den un culminacion di problemanan social asina grandi den nos comunidad cu ta imposibel pa pensa cu den dos aña di tempo lo por resolve tur esaki y caba cu e crisis social aki na Aruba.
Sociaal Crisis Plan a inicia na fin di 2018 y ta sigui traha duro hunto cu 20 diferente socio riba un total di 31 proyecto cu e meta principal pa mehora e sistema di proteccion di mucha y hoben aki na Aruba. Den e prome aña, 2019, a traha incansabelmente pa trece mehoracion y introduci cambionan den structura, legislacion, metodo y maneho entre e socionan di Sociaal Crisis Plan. Den e di dos aña, 2020, a continua, no obstante tur e retonan cu e pandemia di Covid-19 a trece cu ne, na ehecuta e proyectonan y continua pa introduci diferente metodo di maneho y Leynan cu ta crucial pa cu e proteccion di nos muchanan y hobennan. Pa aña 2021 lo continua pa finaliza e proyectonan cu ta cay den e programa y asina sigui cu e planificacion pa proyectonan cu lo cay structuralmente bou di Gobierno di Aruba entrante aña 2022.
Pa tur informacion y documentonan di Social Crisis Plan y e analysis di Unicef Hulanda por bishita www.scparuba.com.
