For di momento cu minister di enseñansa Rudy Lampe dialuna a bay riba un rapport di Directie Onderwijs entrega na november, 2021, e turbulencianan den enseñansa a lanta cabes.
E mandatario a papia di yena cifranan artificialmente cu ta beneficia cierto docentenan. Y e cuerpo di docente di Colegio San Nicolas ta haya cu a yama nan pa corupto. E reaccionnan no a tarda pa yega. E mesun dia den oranan di merdia pa atardi, docentenan a exigi un reunion cu un representante di e ministerio di e minister, cu MT, cu representante di DPS y cu Inspectie Onderwijs.
Tambe a exigi den un carta pa manda un comunicado unda cu e mandatario ta hala atras e ponencianan sumamente ofensivo den nan direccion. Docentenan ta haya hopi lamentable cu ta papia di un rapport cu nan no tabata sa di dje y no a mir’e tampoco cu e mandatario a mencion’e y entrega esaki na miembronan di prensa. Hustamente, e hecho aki ta loke nan ta haya for di sla, cu e veld mes no a haya rapport sino te despues cu a haci’e publico y a duna prensa esaki.
Awe e mandatario a reacciona pero esaki no tabata na agrado di e cuerpo di docente. E unico cos cu e mandatario a bisa cu niun momento el a yama e docentenan pa corupto y a cita loke el a bisa den e conferencia.
E reaccion aki no tabata suficiente pa docentenan, kendenan den un conferencia extraordinario a bisa cu nan no ta contento cu e reaccion aki y ta wardando riba resultado di e reunion despues di 3’or. Nan no a haya confirmacion cu e minister lo bay ta presente tampoco.
Tur cos ta indica, cu e problemanan den enseñansa, of malcontento den enseñansa ta sigui.
