Awor ku sr. Jeser El Ayoubi riba un manera nechi a entrega su asiento bek na Partido PAR, e pregunta kardinal ta bira si miembronan di oposishon ta bai koperá pa trata kredensialnan di e siguiente kandidato riba lista di PAR pa esaki sin problema por drenta i funshoná komo parlamentario.
E espektativa ta ku meskos ku no tabata tin problema pa pasa e kredensialnan di sr. Yves ‘Payo’ Schoop (MAN) 3 siman pasá pa esaki por a wòrdu instalá komo miembro di parlamento ora Elsa Rozendaal a entrega su asiento na partido MAN, meskos lo no mester ta un problema pa pasa kredensialnan di e hóben Emmilou Capriles (PAR) ku ta e siguiente ku pa lei tin ku drenta parlamento.
Lider di frakshon di PAR sr. Walroud ta fló pa kere ku miembronan di oposishon lo bai asina leu pa atrobe bòikotiá un miembro di parlamento di drenta e órgano mas haltu di pais meskos ku na luna di yüli 2020 a hasi kasi un luna largu ku miembro di parlamento sr. Shaheen Elhage (PAR). E ta i e ta keda un bèrgwensa ku sr. Elhage mester a bai te korte i hues a hañ’e ta dikta sentensia i manda miembro di parlamento sra. Moses (MP) koperá i kumpli ku su tarea pa laga su kolega drenta parlamento. Oposishon mei mei den e di dos ola di Covid ta bai pone nos pais den un tenshon atrobe?
Banda di e pregunta aki sr. Walroud ta indiká ku e lo ta un echo masha remarkabel si dado kaso oposishon i sigur partido MFK no koperá. Esaki pa e simpel echo ku MFK lo mustra e ora ei ku e partido no tin problema pa koperá ku un miembro di MAN drenta parlamento, pero si tin problema pa koperá ora ta trata un miembro di PAR. Akaso tin akuerdo entre MFK i otro partidonan ku PAR no sa di dje òf no ta forma parti dje? Esaki ta preguntanan ku lo surgi den pueblo.
P’esei djaweps awor 14 di yanüari, durante e próksimo reunion públiko yamá pa presidente di parlamento, henter pueblo lo ta testigu di kiko ta bai pasa i si parlamento lo bai bek na 21 miembro si òf no. Den porta di elekshon esaki sigur lo ta un punto sumamente alentador pa pueblo tuma nota di dje esta si nos demokrasia i funshonamentu di nos parlamento basá riba nos areglo di estado ta wòrdu respetá ainda si òf no. Partido PAR ta sinta mira.
