Epidemiólogo Dr Izzy Gerstenbluth a duna sifranan tokante edat i sekso di pashèntnan di COVID-19 na Kòrsou ku a fayesé. Tres hende entre 50 i 59 aña a fayesé, dos hende hòmber i un hende muhé. Dos hende hòmber ku tabatin edat entre 60 i 69 aña a fayesé. Den e grupo di edat entre 70 i 79 aña 5 persona a fayesé, 4 hende hòmber i 1 hende muhé. Den e kategoria di 80 te 89 aña 7 hende a fayesé: 6 hende hòmber i 1 hende muhé. Banda di esei un hende muhé di 102 aña a fayesé ku tabata un pashènt di COVID-19. Di tur hende ku a fayesé solamente 4 hende muhé a fayesé. Gerstenbluth a splika ku e mayoria di pashèntnan di COVID-19 ta kai den e grupo ku edat haltu, manera ta konosí. ‘Tur ta lástima naturalmente, pero ku e gráfiko mi ke duna un imágen kon ta para ku variashon di edat ku hende ku a fayesé.’
Gerstenbluth a splika ku ta opvio ku na Kòrsou mas hende hòmber a fayesé ku hende muhé. ‘Dikon e ta asina?’ Segun Gerstenbluth e tin di aber ku e malesanan króniko ku hende por tin. ‘Si bo wak sifranan di Kòrsou, hende hòmber ta biba ménos largu ku hende muhé.’ Gerstenbluth a splika ku hende muhé ta hopi mas fuerte ku hende hòmber. ‘Hende hòmber no ta gusta tende esaki, pero nan ta ménos fuerte. Anto hende hòmber ta mas mimu ku hende muhé. Nan no ta bai dòkter. Nan tin miedu.’
Tambe nan ta tene nan mes ménos bon na sierto reglanan. Segun Gerstenbluth hende hòmber tin mas chèns di haña atake di kurason etc. ‘I kòrda bon ku e hendenan ku a fayesé tabatin COVID-19, pero mayoria di nan tabatin un malesa kaba.’ Segun Gerstenbluth hopi hende ku fayesé di COVID-19 a kore peliger kaba.
