Un felis y dushi siman nobo pa nos tur, colma di salud, amor, paz, alegria y sabiduria !
Aunke Prensa a cubri nos actividad di presentacion y bautizo di nos buki “Alegria di Ruthy Poema 2 “ anja pasa, nos ta inspira ketobay den nos curazon pa nos tambe comparti un crenchi di e bunita atardecer aki di e dia 21 di December 2020, fecha inolvidabel pa Lady Ruth y su esposo Johan, pasobra esaki ta e fecha di nan 43 anja di felis bida matrimonial. Tawata un atardecer di bendicion y hopi amor, un atardecer cu a keda graba den nos mente, alma y curazon.
Tawata un otro sonjo bira realidad, anto den anja 2020 cu Covid, Corona Virus andando cu tur hende cuidando nan mes, nan grandinan y henter nan famia.
Ta ora cu e bukinan a yega for di Colombia nos por a yama aki aya organisa su presentacion y bautizo. Esaki a logra na Unoca, cu un danki di curazon na su director hoben y dinamico Ray-anne Hernandez. Unoca ta nos sponser di mas grandi den e projecto aki, hunto cu Prins Bernhard Fonds Caribisch Gebied cu bunita personanan di contacto na nos ruman isla Corsouw: Claudia, Edith y Melanie Sloot. Tawata un atardecer hopi, pero hopi bunita, alegre cu musica di nos mihor guitarista clasico Jerry Diaz, kende a toca canticanan di amor y di Pascu y a peticion di Ruthy e cancion di amor cu a ser toca y canta 43 anja pasa “Let it be me” ora cu Johan y Ruthy a priminti amor fiel na otro. Esaki a inspira pone Lady Ruth cuminsa canta y publico presente a join e den su cantamento, oh asina bunita y emocional ! Un sala di Unoca yen di amor. Mas dushi ambiente cu juice y snacknan dabaru di famia Kelkboom. (Na yegada tur a ricibi un dushi pastechi crioyo di ham cu keeshi di amiga Jadi di Wild Snacks). E artista multifacetico John Fredy Montoya di Departamento di Cultura DCA cu a percura di a cambia e sala di Unoca den un sala di mas amor cu e color corra di e cortina y e tafel laken nan riba e mesanan. Un honor grandi pa Lady Ruth pa por tawatatin su querido tata Sr. Lucas Bergen di 88 anja, como padrino y bunita amiga Nilka Franka como madrina. Un grupo di 30 invitados, entre otro : Des Croes di Arubiana Caribiana, Clarette Quandus, Nico Luydens, Desiree Correa, Olga Buckley, Henry Dabian, Munye Winklaar Oduber, Laureen Eman, Stan Dabian, Benjamin Romero,Abigail Arends y mas cu claro Ruthy su otro mitar, su amor grandi cu semper ta kere den dje y apoyele den tur cos, su querido esposo Johan Vrieswijk. Tur a bay cas cu un buki como regalo di Pascu. Amiga Ariana Koolman cu su nomber artistico Lady Ari a recita Ruthy su poema mas gusta “Mi ta un indjan”, mientras Ruthy como Lady Ruth a toca e drum riba e ritmo di e poema, cu a cai na agrado di tur presente. Lady Ruth a gradici tambe e artista Irene Peterson cu e parti di illustracion, cover, lay out etc. di e buki “Alegria di Ruthy Poema 2″ y Ramon Todd Dandare pa e parti e.o. di correccion den e ortografia y vocabulario aki aya den nos dushi idioma Papiamento. Lady Ruth su dos man drechi den henter e projecto aki. E buki aki tin 15 poema na Papiamento, 2 na spanjo, 7 na ingles y 5 poema na hulandes. Un di e poemanan na hulandes ta papia di Covid-19 den anja 2020 titula :” Het jaar 2020 plus ?” Lady Ruth su curazon a yena bay over di gradicimento y alegria pa tawata rondona pa colega amiganan escritor y algun famia y bon amigonan aprecia y respeta manera Mirian y Mirto Koolman, cu semper ta apoya Ruthy den su projectonan. (Antes den scouting y despues den su dos One woman shownan). Un danki diki gordo na un y tur pa e apoyo y atencion di curazon. E decoracion cu a consisti tambe di potretnan grandi di su bunita y querida Mama Mercedes Bergen Tromp kende no por tawatey presente, y di su yuinan, nieta y nietonan cu ta biba na Hulanda. “Alegria di Ruthy Poema 2″ ta dedica na nan tur, pero specialmente na e dos nietonan di mas chikito Edward y William . Danki pa lesa nos relato cu atencion. Danki na Prensa pa su publicacion di curazon .Stay safe. Love you too !
