A.T.A. ta desea pa informa nos comunidad di e situacion actual pa loke ta trata e industria turistico, conforme informacion compila na e momentonan aki.
Den luna di december aruba a ricibi 42,936 turista
TURISMO ‘STAY-OVER DURANTE DECEMBER 2020’
Pa loke ta e cifranan di december 2020 compara cu november 2020 por nota un aumento di 44.5% – Aruba a ricibi 42,936 turista cual ta 13.222 mas cu november 2020. Apesar cu e resultado ta bao di e scenario conservativo, e ta mustra un bon adelanto pa loke ta e progreso di nos turismo durante e pandemia global.
Di e turistanan cu a bishita nos destinacion durante december 2020, 34,700 (80.8% di e total di turista pa nos isla) tawata procedente di Norte America y 4,871 (11.3% di e total di turista pa nos isla) tawata procedente for di diferente paisnan Europeo. Durante e mesun luna aki a bolbe habri fronteranan pa Latino America (cu excepcion pa Venezuela y Peru) y Aruba a ricibi un total di 2,034 bishitantenan procedente di e region aki cu ta 4.7% di e total di turista pa nos isla. Un total di 1,331 bishitante (3.1% di e total di turista pa nos isla) tawata procedente di otro pais/islanan den region.
KICO ARUBA A PRODUCI EN TOTAL NA TURISMO PA 2020?
Normalmente ta duna e cifranan di un aña completo pa mira con Aruba a cera e aña.
Sinembargo – debi na e pandemia global Aruba a cera y bolbe habri su fronteranan na juli 2020. Door di esey, e cifranan a cambia y por mira riba e grafico con- desde e reapertura gradualmente di nos fronteranan- nos destinacion a bolbe crece poco poco
Pa loke ta e cifra total di turismo pa 2020 (januari-december), Aruba a ricibi 368,322 bishitante, cu ta un caida di -67.1% compara cu full aña 2019. E caida den turismo ta loke otro destinacionnan den e region Caribense tambe ta observando.
Si nos mira e cifranan desde cu nos frontera a bolbe habri na juli 2020 te cu december 2020, Aruba a produci un total di 139.570 bishitante pa nos destinacion.
Ta sigui pone enfasis riba e importancia di e comportacion di nos comunidad pa tene nan mes na e reglanan stipula. Asina nos por mantene nos casonan di Covid-19 bao control y sigui atrae e turistanan pa nos destinacion como un luga di vacacion sigur.
HOTELNAN / AHATA
Segun Aruba Hotel and Tourism Association, na december 2020, e ‘Average Daily Rate’ (ADR) a baha cu 18.6% compara cu e mesun luna na 2019. Esaki den cifra ta US$ 339.17 na 2019 compara cu US$ 276.05 pa 2020. E entrada pa camber disponibel, e asina yama RevPAR a baha cu 65.6% di US$ 280.41 na 2019 pa US$ 96.39 na 2020.
E ocupacion den nos hotelnan a baha cu 57.8% compara cu november 2019.
E cifranan di AHATA ta basa riba 19 propiedadnan y 6 timeshare hotels, cual ta mayoria di e hotelnan cu excepcion di Hilton Aruba Caribbean Resort & Casino.
TURISMO CRUCERO
E industria di crucero a paralisa desde inicio di e pandemia y ainda no tin fecha concreto riba re-inicio di operacion den e region di Caribe. E industria ta pendiente pa CDC (Centers for Disease Control and Prevention) aproba e recomendacionnan di e protocolnan relaciona cu COVID-19 pa barconan di crucero.
Desde maart 2020, Aruba no a ricibi turistanan crucero. E situacion di e barconan cu por mira staciona den nos waf ta un asina yama ‘warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.
TOURISM CREDITS / CENTRAL BANK OF ARUBA
Di acuerdo cu Banco Central e asina yama ‘Tourism Credits’ (cual anteriomente tawata wordo yama ‘Tourism Receipts’) pa e prome kwartaal di aña 2020 a contribui cu AWG 1.017.9 miyon den nos economia, cu ta 7% menos compara cu e mesun temporada na 2019. Esaki naturalmente ta debi na e pandemia global di Covid-19 unda Aruba tambe a cera su fronteranan temporalmente cual a inicia na luna di maart 2020 te cu juli 2020.
Mescos cu otro destinacionnan, nos isla ta pasando den momentonan di reto pa loke ta trata e pandemia aki. Ta importante pa nos tur sigui e protocolnan manera stipula door di diferente instancianan. Hunto nos lo vence y nos isla y su turismo lo sigui florece.
