6 di januari, 2021, voluntarionan y personal di Cruz Cora Aruba a ricibi bishita di Secretario di Estado, Sr. Raymond Knops. E bishita aki tabata uno diferente, unda Sr. Knops a haña un presentacion extenso di henter e team cu durante 2020 a traha den e programa di ayudo humanitario Covid-19 pa comunidad di Aruba.
Durante e presentacion aki, por a wak un video cu ta mustra un dia durante e programa aki, por wak voluntarionan trahando den tur area. Tambe a comparti mas detayes di e programa Red Rose cu ta wordo usa pa coordina tur logistica di e programa aki, a splika con e sistema di e E-voucher ta funciona y na cierto momento, Director di Cruz Cora Aruba, Sr. Michel La Haye a pidi Sr. Knops pa “top-up” algun kaarchi digitalmente pa asina e grupo cu mester haña su fondonan deposita riba su kaarchi por ricibi esaki. Sr. Knops na e momento aki a click “Approved” y asina autoriza e fondonan aki pa bai riba e kaarchinan.
E team a splika mas di e programa ,ta hopi satisfecho y orguyoso di a logra parti 75.000 cuminda cayente, y 8000 e-voucher na 20.000 persona. Tambe a haci mas di 100 bishita na patient di Covid-19 cu dokter di cas.
Despues di e presentacion aki, a guia Sr. Knops pa parking-lot, unda e por a subi auto hunto cu un voluntario y Sr. La Haye pa por bai participa na e programa Meals on Wheels. A bishita algun adres y Sr. Knops mes a haci entrega di e cuminda cayente na e casnan y papia cu e famianan di nan situacion y con e ayudo di Cruz Cora a haci un diferencia pa nan. Tabata su deseo pa por participa na e trabou y experencia hunto cu e voluntarionan e parti aki di e trabou.
Cruz Cora Aruba kier gradici Sr. Knops y su delegacion pa e bishita y sosten.
