Refineria di Kòrsou (RdK) a informá komunidat ku a alargá ku un siman adishonal, e fecha di entrega di e proposishonnan obligatorio (“binding proposals”) pa e partidonan ku a keda riba e lista kòrtiku (“short list”) den e proseso di búskeda di un partner stratégiko pa nos fasilidatnan petrolero.
Dia 18 di Desèmber último Project Management Organization (PMO) a risibí e ofertanan obligatorio di e partidonan ku a sobra den e proseso. Den un proseso transparente i despues di un análisis profundo, PMO a entregá su trabou na Gerensia di RdK. Gerensia di RdK na su turno a proponé na Hunta di Komisario di RdK e kantidato pa sigui negoshá kun’é. Dia 2 di Yanüari e organonan statutario di RdK a bai di akuerdo ku e rekomendashonnan di Gerensia di RdK. Tambe Konseho di Minster a rekonfirmá e desishon ku a keda aprobá pa e organonan statutario di RdK, konforme e statutonan vigente.
E kompania selektá pa sigui negoshá kun’é ta Curaçao Oil Refinery Complex B.V. (CORC B.V.).
Awor lo bai inisiá e fase di negosashon pa yega na un kontrato di maneho i un modelo di partisipashon entre RdK i e partido menshoná. Na mes momentu e partido aki lo bai negoshá ku Gobièrnu di Kòrsou un kontrato ku lo kubri e kondishon pa maneho i operashon di e fasilidatnan petrolero na Kòrsou. Manera kumbiní den e kuadro di tempu stipulá, ta premirá di por negoshá tur akuerdo simultaneamente, ku meta pa firma tur dokumentashon pa mas tardá kuminsamentu di Mart awor.
RdK lo kontinuá ku su esfuersonan pa sigui informá komunidat riba e proseso aki pa desaroyo di e industria petrolero di pais korsou.
