Awe 6 di januari 2021 nos ta conmemora e di 20 aña di fayecimento di un di e gran estadistanan Arubano sr. Watty Vos. Mes momento tin cu menciona cu 1 januari 2021 nos a recorda e di 35 aña di Status Aparte, cual tambe tabata e momento cu sr. Watty Vos a huramenta como ministro di husticia y deporte como miembro di e prome gobernacion di pais Aruba, gabinete Eman I. Esaki tabata e di dos bes cu sr. Watty Vos a huramenta como ministro for di un total di cuatro.
Nacemento y estudio
16 di augustus 1937, na Weststraat 16 den Rancho e bario di piscadornan di Playa, a nace sr. Edgar Joaquin Vos mihor conosi como Watty. Su persona tabata e di cuatro for di cinco jui di e pareha Salomon y Genoveva Vos-Tromp. Como studiante Watty a bai St. Dominicus College na cual scol el a hanja su MULO- diploma, tambe e tabata tin diploma di adjunct- commies y abogado.
Deporte
Watty tabata un ex internacional di Aruba y Antiyas Hulandes den e ramo di futbol. Como miembro di seleccion di futbol di Antiyas a logra na Cuba medaya di plata despues di Costa Rica. Na Puerto Rico durante di e weganan Centro Americano y di Caribe representando Antiyas, e seleccion a logra medalla di plata despues di Mexico. Watty a defende tanto Aruba como Antiyas na Suriname, Salvador, Costa Rica y Jamaica. Na Aruba Watty a defende su isla contra equiponan di Brasil (Bangu, Fluminense), Bolivia, Peru, Ecuador, Colombia, Venezuela, Inglatera (Arsenal). Watty a semper a milita den e club local Aruba Jrs. E weganan mas importante cu Watty tabata considera cu ela hunga den su bida tabata contra Arsenal di Inglaterra (2-2) y su prome wega contra Costa Rica, cual Aruba a gana 1-0.
Musica, social y sindicalismo
Watty tambe a sa di gosa di fama como musico durante e temporada como integrante den e conjunto Los Duques cual conjunto a sa di gosa di un popularidad enorme na Aruba cual a pone tambe cu nan a worde contrata pa e inauguracion di Aruba Caribbean Hotel. Watty tabata fungi como drummer, cantante y manager. Watty tabata vicepresidente di Jaycees di Antillas Hulandes y miembro di directiva di Toastmasters di Aruba den cual organizacion ela forma su mes e.o. como orador publico. Watty ta fundador di e prome directiva y di Centro di Barrio di Playa Pabao. Watty tabata presidente di sindicato di empleadonan di gobierno di Aruba.
Empleado publico y abogado
Watty pa varios aña a cubri e posicion di sub- hefe di e departamento di Domeinbeheer, awendia jama DIP. Su persona a fungi activamente como abogado durante e periodo 1989 pa 1994 trahando hunto cu e oficina Gonzalez, Zielinski y Gibbs, aunque cu ya desde 1970 ela worde acepta como miembro di bali y ela huramenta como tal.
Politica
Watty ta co- fundador di partido MEP, fundador di partido RUBA, cual despues na 1982 a uni forza cu partido AVP, partido cu Watty a keda miembro te cu su fecha di fayecimiento. Watty a haci su debut den politica na anja 1971 ora cu su persona hunto cu sr. Betico Croes (q.e.p.d.), sr. Daniel Leo (q.e.p.d.) y sr. Efrem de Kort (q.e.p.d.) a funda partido MEP. Desde su debut den politica y te na eleccion di 1997 cual porcierto tabata e ultimo eleccion cu Watty a participa, semper ela worde escogi cu votonan preferencial.
1971- 1973: miembro di eilandsraad;
december 1973- december 1975: minister di husticia y vice premier di Antiyas Hulandes den gabinete Evertsz;
mei 1976- februari 1977: diputado y alaves miembro di eilandsraad;
1977- 1985: miembro di eilandsraad;
23 december 1985- 31 december 1985: diputado
1 januari 1986- februari 1989: minister di husticia di Aruba den gabinete Eman I; februari 1989- september 1994: miembro di Staten;
1 september 1994- 6 januari 2001: minister di husticia y obras publico di Aruba den gabinetenan Eman II y III.
Algun di e tanto projectonan sea personal of a forma parti di nan
1973-1975: scol pa polis, ampliasion di e cantidad di studiantenan Antillano y Arubano na academia policial na Apeldoorn, introducsion di R.A.I.O.-opleiding (mr. Jaime Saleh ex juez, ex president di corte comun di husticia y ex gobernador di Antiyas Hulandes ta e prome graduado di e opleiding aki), lider di e delegacion di Reino cu a negocia e delimitacion di laman entre Antiyas Hulandes (Aruba) cu Venezuela, introducsion di ley di habilitasion pa e ser femenino casa, prome 3 sernan femenino como agente policial pa Aruba;
1976: e prome barrionan di casnan di pueblo na Tarabana y Madiki;
1977: unico (lider) politico di oposicion cu a bay Hulanda despues di augustus scur manera miembro di e delegacion Arubano encabesa pa sr. Betico Croes;
1979: miembro di e comision di Reino y ”Antiliaans Spoor”;
1981 y 1983: a forma parti di e delegacion Arubano na e 2 conferencianan di Mesa Rondo na Den Haag;
1986- 1988: establese contactonan cu tanto gobiernonan extranhero y instancianan internacional pa profesionalisa cuerpo policial y pa coperasion hudisial, introducsion di strandpolitie, boto di polis PB 1, kustsurveillance conforma pa cuerponan policial y di aduana, introducsion di comision, legislacion y plan pa combati calamidad, Watty a bolbe manda tres hoben Arubano pa sigui nan estudio como inspector di polis na e mesun academia policial aki, den cual grupo pa prome biaha den historia di Aruba un dama a bai studia na e academia policial aki; introduccion di migración Mericano na aeropuerto Reina Beatrix;
1994- 2000: reintroducsion di kustsurveillance conforma pa cuerponan policial y di aduana, introducsion di wardacosta Antiyas Hulandes y Aruba, compra di casnan di pueblo pa nan habitantenan pa medio di huurkoop, duna contenido na e miembresia di Aruba na e organisacion internacional CFATF, centro Dakota y centro Colorado, polis di barrio, introducción di patrulla policial riba bicicleta, “Task Force” di tur e departamentonan di Obras Publico cu a percura pa diferente verkavelingsplannen na Aruba y construcsion y renobasion di varios proyecto na San Nicolas, Dienstbeveiliging Aruba cual despues a cambia pa Cuerpo Especial Arubano (CEA).
Condecoracion y reconosimento
Pa su labornan incansabel como gobernante y tambe riba tereno social durante Antiyas Hulandes y na Aruba varios ta e condecoracionan cu Watty a ricibi tanto for di Casa Real Hulandes como for di gobierno Venezolano. For di gobierno Venezolano Watty a wordo condecora cu e orden Francisco de Miranda. Na 1980 Watty a wordo condecora den e orden di Ridder in de orde van de Nederlandse Leeuw y na 1990 a wordo promovi pa Commandeur in de Orde van Oranje Nassau. Ademas di Watty, sres Lupe Beaujon (qepd), Benny Nisbeth (qepd) y Fredis Refunjol ta e unico 4 juinan di tera cu a wordo condecora cu esun ultimo.
Mr. Drs. H.L.B. van Aller, ex profesora na Universidad di Aruba a declara den su buki “De vrijheid van meningsuiting en het onschendbaar beledigen” riba pagina 9: “De AVP is aanzienlijkversterkt door het aantal stemmen dat Watty Vos als stemmentrekker in de Rancho kon en kan aanbrengen. Het zou nuttig zijn als politieke leiders ten behoeve van de partij meerdere sterke en intelligente personen in de partij zouden dulden.” Traduccion: “ AVP a worde enormemente fortifica door di e cantidad di votonan cu Watty como vote-getter den Rancho por y trece pa partido. Lo ta masha util pa lidernan político na beneficio di e calidad di e partido por tolera den partido mas persona fuerte politicamente e inteligente’’, refiriendo na Watty.
Den su discurso cu ministro de Vries a tene na januari 2001 durante e reunion solemne di parlamento Hulandes na unda nan a recorda Watty enconecsion cu su fayecimiento e la resalta cu ta danki na e perseverancia di Watty cu Aruba y Antiyas Hulandes tin Guardacosta di Reino ta patruya den nan awanan teritorial. Tambe den e mesun reunion solemne aki ministro de Vries a subraya tanto e calor humano y pacificador cu Watty a sabi di demostra den su carera politico, algo cu ta difícil pa hanja awendia den política.
Mientras cu e ministro presidente sr. Wim Kok (dfm) durante e reunion solemne aki y despues di a repasa e curriculum vitae di sr. Watty Vos, a recorde como un constructor di brug pa mantene bon comunicacion entre e partnernan den Reino y dirigi pa trata y soluciona asuntonan a base di consensus pa asina contribui grandemente pa un relacion fructifero den Reino Hulandes.
Na nivel internacional Watty ta e promer Arubano cu a wordo elegi como presidente di un organisacion internacional, Caribbean Financial Task Force (C.F.A.T.F.) Aki na Aruba gobierno a honrele cu e scol di polis na su nomber y Avenida E.J. Watty Vos cual despues di a completa su construccion a bira Watty Vos Boulevard.
Por ultimo pa conmemora e di 20 aniversario di fayecimento di sr. Watty Vos, fundacion na memoria di sr. E.J. (Watty) Vos ta invita bo persona na un sacrificio di misa na Iglesia San Francisco na Playa pa 7or di awenochi.
