Despues di a pasa e dianan di fiesta den seno di famia i pensa trankil atraves di kua medio mi por sigui sirbi pueblo di Kòrsou ku mas efektividat, mi ta anunsiá awe na komienso di aña 2021 ku orguyo ku mi ta afiliá mi mes na Partido Democraat.
Mi ta konvensí ku tempu difísil ta eksigí un aserkamentu diferente pa komo pueblo nos logra resultadonan diferente. Sigui hasi e mesun kosnan i spera ku esei lo duna nos resultadonan diferente a demostrá di forma kla ku nos pueblo no ta avansá.
Durante un aserkamentu Partido Democraat den su konstelashon nobo a mustra di tin un koriente fuerte i ku ta determiná pa bai hasi e diferensia atraves di un programa di akshon ku ta duna speransa pa nos ban alsa Kòrsou i poné riba un nivel mas ayá. Mi ta kere den esei i mi a keda impreshoná ku Partido Democraat su programa di akshon pa Elekshon di aña 21 i su ehekushon pa pròksimo añanan pa asina nos ban alsa Kòrsou i duna nos pueblo speransa riba un futuro briante. E programa di Partido Democraat ta unu balansá, realístiko i ku e aserkamentu diferente ku Kòrsou mester na e momentunan aki. Ehekushon di e programa aki ta tuma tempu. Pero e ta kontené sufisiente aspektonan tambe ku por kuminsá duna resultadonan durante di e promé 6 luna pa un aña di gobernashon na benefisio di nos pueblo.
Nos pueblo ta pasando den tempunan hopi difísil i esaki ta pidi pa un aserkamentu diferente, integral i di inovashon. E enfoke di e programa di Partido Democraat den su konstelashon nobo entre otro ta pa aserká desaroyo ekonómiko na un manera diferente. Konhuntamente ku esaki Partido Democraat ta determiná pa enfoká riba desaroyo di tur Yu di Kòrsou komo ser humano. Ademas e tim di Democraat lo pèrkurá pa tin e balansa sosial nesesario pa nos atendé ku e retraso sosial grandi ku tin den nos pais. Tambe pa pèrkurá pa nos hendenan ménos pudiente por sinti un alivio real mientras ta fortifiká nos estado di derechi pa pueblo di Kòrsou por progresá. E tim di Democraat a inspirámi e konfiansa i kapasidat nesesario pa nos ban dobla manga traha di forma firme i ku un direkshon kla pa saka nos pais for di e tempunan difisil ku nos ta den. Un tim ku a bin ta traha di forma inkansabel i ku hopi ánimo pa pone Partido Democraat bèk riba e tarima polítiko, pa sirbi Pueblo di Kòrsou dunando direkshon atrabes di un Agenda ku Partido Democraat lo presentá proksimamente.
Pa hopi di boso mi eskoho pa afiliá na Partido Democraat no ta un sorpresa, ya ku partido Democraat ta mi kuna. Kaminda mi tata Boy Rozendal, tio Frank Rozendal i tio Abel Arrindell a hiba nan karera polítiko ku éksito na bienestar di un Kòrsou fuerte i ku a konosé tempunan glorioso. Mi ta konvensí ku nos por logra tempunan glorioso atrobe atraves di un aserkamentu diferente.
Bayendo bèk na mi infansia, mi ta rekordá kon huntu ku nos mama nos tabata kompañá mi tata na anochinan di kontakto kolmá di hende na sede di Democraat na Santa Maria. Durante e anochinan aki, Boy mi tata, komo lider polítiko, tabata inspirá i konektá ku e ‘krachinan’ i simpatisadónan. Mi tata defuntu Boy su deseo grandi tabata pa ami for di na yòn djòin partido Democraat su Ala Hubenil. Awe mi ta kumpli ku su deseo dor di djòin partido Democraat.
Ku e antorcha sendé sendé di partido Democraat nos ta bai iluminá e kaminda pa hasi Kòrsou un pais manera nos tur ta anhelá.
