Gezaghèber di Entidat Públiko Boneiru ta anunsiá pa medio di esaki ku relashoná ku kambio di aña e ta duna eksonerashon general pa e prohibishon pa sende vürwèrk manera stipulá den artíkulo 31 sup b di Algemene Politie Keur di Boneiru for di 31 di desèmber 2020 te ku 1 di yanüari 2021. Pa sendementu di vürwèrk pafó di e periodo menshoná ariba i pa sendementu di vürwèrk ‘grandi’, manera pagara, mester di pèrmit.
No por sende vürwèrk dentro di un stral di 250m. di hòspital i institushonnan di kuido i edifisionan unda ta tene sirbishi di misa. Ademas no ta pèrmití pa sende vürwèrk dentro di un stral di 250 meter for di pòmp di gasolin i depósito di materia eksplosivo i kombustibel leve. Sendementu di vürwèrk ku ta bai den laira no por sosodé na un lugá ku por okashoná peliger pa tráfiko aéreo.
Apesar di e eksonerashon general akí, tur hende ta keda responsabel pa eventual leshon i daño okashoná na persona, bestia i propiedat. Pa evitá daño i aksidente, gezaghèber ta hasi un apelashon riba tur hende pa ora di sende vürwèrk pa tene kuenta ku medidanan di prekoushon i koutela nesesario. Manera mantené distansia nesesario ora di sendementu i sende vürwèrk solamente manera indiká den e indikashon di uso i den ningun kaso no tira vürwèrk riba hende òf bestia.
