Wardakosta i outoridatnan lo kontrolá abase di reglanan di COVID-19 riba laman
Djadumingu patruyanan di Wardakosta a bolbe ehekutá kontrolnan riba laman. E kontrolnan a
tuma luga durante di dia na entre otro pir di Sta. Barbara i Fuikbaai. Durante e patruyanan di
djadumingu e públiko i e ‘boat community’ a tene nan mes na e medidanan bálido riba laman i
no tabatin nada partikular ku a sosode. Wardakosta konhuntamente ku Kuerpo Polisial di
Kòrsou i Haveninspectie lo keda kontrolá severo riba laman e wikèntnan ku ta bini.
Prinsipalmente lo kontrolá e promé djadumingu di yanüari 2021 pa evitá ku botonan ta bai
Fuikbaai. Manera ya ta konosí, e Fuikdag 2021 lo no ser permití i ta hasi un apelashon na
komunidat i e ‘boat community’ pa tene kuenta ku esaki. No ta permití pa organisá Fuikdag òf
tene ningun tipo di enkuentro òf evento bou di ningun nòmber riba laman, na Fuikbaai, Klein
Kòrsou òf otro bahianan manera Westpunt, Piscadera òf Jan Thiel durante di e pandemia, pa
evitá aglomerashon di hende.
E kontrolnan ku Wardakosta ta ehekutá ta pa pone ordu públiko i pa personanan mantené nan
mes na e medidanan ku Gobièrnu di Kòrsou a stipulá pa evitá COVID-19 sigui plama riba nos
isla. E medidanan vigente riba laman pa botonan ta, ku ta permití solamente dos boto mará
banda di otro i un máksimo di kuater (4) persona riba un boto.
Siguiendo medidanan stipulá di COVID-19 pa Gobièrno di Kòrsou nos ta evitá pa e vírùs di
corona sigui ser transmití. Porfabor skucha notisia i informashon di gobièrno pa bo keda na
altura di e medidanan vigente. Wardakosta konhuntamente ku otro outoridatnan konserní ku
orden públiko lo bai keda hasi kontrolnan servero riba laman.
