Siman pasa durante tratamentu di presupuesto 2021 Parlamento di Kòrsou di frakshon di MAN a bini ku un moshon riba inisiativa di Parlamentario Giselle Mc William den kual ta urgi gobièrnu pa laga hasi un investigashon riba dunamentu di lès di forma virtual.
No ta un sekreto ku e pandemia di Covid-19 a destabilisá tur gremionan rònt mundu inkluso enseñansa.
Pa por a sigui duna lès skolnan i maestronan den un fregá di wowo sin ningun klase di preparashon i sosten mester a kuminsá duna lèsnan di forma virtual aki na Kòrsou. Un kambio drástiko pa e muchanan pero tambe e mayornan sin lubidá e reto di maestronan pa por duna lès. Aktualmente ya tin kasi 5 luna kaba ku lèsnan ta ser duna di forma virtual aki na Kòrsou. Mirando ku ainda nos no por mira den aña 2021 kiko e pandemia aki por trese kun’e òf otro tiponan di situashon, ta importante pa hasi un investigashon rápido riba kiko dunamentu di lès virtual a nifiká pa e kalidat di enseñansa, pero tambe pa ku preshon di e trabou di maestronan.
Lèsnan virtual ta algu di e era aki i nos tur ta di akuerdo ku esaki pero e mester sosodé na un manera responsabel ku e fundeshi di konosementu ku guia pa tantu e maestronan, alumnonan i mayornan.
Frakshon di MAN ta para pa inovashon den enseñansa den tur gremio, pero nos mester sòru pa esaki ta bon implementá pa awor aki i pa den futuro.
