Autoriteit Consument & Markt (ACM) a stipulá e tarifanan máksimo pa produkshon i distribushon di koriente na Boneiru, Saba i Sint Eustatius, ku lo ta na vigor entrante promé di yanüari 2021. Pa Boneiru i Sint Eustatius ACM a stipulá tambe e tarifanan pa awa di bebe.
ACM ta stipulá anualmente e tarifanan máksimo pa produkshon i distribushon di koriente i awa di bebe na Hulanda Karibense a base di e gastunan ku produktor- i distribuidornan di koriente i awa di bebe ta hasi. E kompanianan akí na final ta stipulá e tarifanan ku nan lo kobra nan klientenan den 2021, teniendo na kuenta e límitenan máksimo ku ACM a stipulá.
Gabinete anteriormente a anunsiá ku ta prolongá e tarifa sero temporal pa konekshon di koriente i awa pa tur kas di famia i kompania te fin di 2021.
E medida akí no ta konta pa e tarifa variabel di uzo (tarifa pa kWh i m3). E impreshon general ta ku riba tur isla e máksimo pa e tarifanan akí lo subi entrante promé di yanüari 2021, partikularmente pa motibu di oumentu di e gastunan di kombustibel pa produsí koriente i awa di bebe.
Boneiru
Pa Boneiru e tarifa máksimo di konsumo di koriente ta subi di mas òf ménos 0,23 USD/kWh na mas òf ménos 0,26 USD/kWh. E límite máksimo pa e tarifa di pagabon (prepaid) ta subi di mas òf ménos 0,44 USD/kWh na mas òf ménos 0,46 USD/kWh. E oumentunan akí tin partikularmente di aber ku gastunan mas haltu premirá pa produkshon di elektrisidat. Pa uzo di parti di un kas di famia promedio esaki ta nifiká un oumentu di mas òf ménos 6 USD pa luna riba e kuenta di koriente.
E tarifa máksimo pa uzo di awa di bebe ta subi di mas òf ménos 3,77 USD/m3 na mas òf ménos 3,81 USD/m3. Pa un kas di famia promedio esaki ta nifiká un subida di mas òf ménos 0,5 USD pa luna riba e kuenta.
Saba
Pa Saba e tarifa máksimo pa uzo di koriente ta subi di mas òf ménos 0,22 USD/kWh na mas òf ménos 0,29 USD/kWh. Esaki tin partikularmente di aber ku e gastunan mas haltu premirá pa produkshon di koriente. Pa uzo di parti di un kas di famia promedio esaki ta nifiká un oumentu di mas òf ménos 16 USD pa luna riba e kuenta di koriente.
Sint Eustatius
Pa Sint Eustatius e tarifa máksimo pa uso di koriente ta subi di mas òf ménos 0,25 USD/kWh na mas òf ménos 0,27 USD/kWh. E oumentu tin partikularmente di aber ku e gastunan mas haltu premirá pa produkshon di koriente. Pa uzo di parti di kas di famia esaki ta nifiká un subida di mas òf ménos 6 USD pa luna riba e kuenta di koriente.
E tarifa máksimo pa uzo di awa ta subi di mas òf ménos 6,63 USD/m3 na mas òf ménos 6,73 USD/m3. Pa un kas di famia promedio esei ta nifiká un oumentu di mas òf ménos 1 USD pa luna riba e kuenta.
