Un persona ku a sobresalí riba tur otro alsando nòmber di nos pais ku su aktonan nos ta domine komo un baluarte i asta komo un héroe. Den nos trayektoria komo pais nos nashon a konosé diferente persona ku a sobresalí poniendo nòmber di nos pais den un lus positivo i korektamente nos a duna nan e honor meresí nombrando sea un kaya, un plenchi òf un retonde na nan nòmber. Den pasado tabata asina ku nos tabata duna un nan e honor na momento ku nan no ta na bida mas. Algun tempu pasa nos a kuminsá korektamente na duna honor ora e persona ta na bida di manera ku nan tambe por disfrutá di e momento ku pais ta duna nan e mérito komo un di su yu nan ku a destaká. Un di e personanan ku segun frakshon di MAN sigur meresé un rekonosementu i honor di tin sea un kaya, retonde òf plenchi na su nòmber ta honorabel señor Rudy Plaate.
Sr. Plaate ta un kantante, kompositor ku atrabes di mas ku dos dékada a presentá riba tereno
kultural, sosial i musikal ku a presentá diferente komposishon ku un mensahe patriótiko pero tambe poniendo atenshon riba situashon sosial , kultural i ekonómiko di nos pais. Sr. Plaate tabata un di e pioneronan ku a kere for di prinsipio ku nos mes mester produsí nos mes kuminda i a propagánda plantashon na gran eskala riba nos suela. Sr. Plaate a aportá tambe engrande na desaroyo musikal di nos hubentut dor di yuda lanta e agrupashon musikal hubenil mas konosí e tempu di den nos pais ku ta Las Perlitas. Sr. Plaate a destaká komo: kantante, kompositor, musikante, agrikultor, komersiante, dirigente musikal, kanta-outhori promotor di balornan patriótiko. Mirando tur loke sr Plaate a hasi pa nos pais meresidamente a presentá un dokumental tokante su bida i su logronan ku e nòmber “Atardi” refiriendo na e kantika mundialmente konosí ku e mes a
komponé
Frakshon di MAN ta di pensamentu ku a yega e momento awor pa komo pais nos duna sr. Plaate e rekonosementu ku e meresé. Motibu pa kua frakshon di MAN ta aserka Minister di Enseñansa Siensia Kultura i Deporte sr. Croes ku e petishon pa duna sr Plaate e honor na bida i pa nombra mas pronto posibel un kaya, plenchi òf retonde na su nòmber. Nos sa ku tin mas hende ku a destaká i meresé honor i rekonosementu i nos ke pidi minister pa pone atenshon na nan tambe. Laga nos duna honor I balor na nos yunnan di tera na bida.
