Kralendijk – Kontrali na lokual a keda publiká, no a pone e hefe di departamento di Salubridat Públiko riba ‘non-aktif’. E publikashon tokante esaki den un matutino na papiamentu no ta basa riba bèrdat. Entidat Públiko Boneiru ta lamentá e publikashon enorme. Sigur paso empleadonan públiko ku ta keda lastra den media no por defendé nan mes abiertamente.
E departamento di Salubridat Públiko delaster lunanan ta funshoná bou di hopi preshon pa motibu di e krísis di corona. Na e departamento di Salubridat Públiko ta hasi e tèstnan di Covid-19, einan tin e ‘callcenter’, i ta e sentro di e tim médiko ku ta atendé e krísis di corona. Aparte di esakinan e trabounan ta kontinuá pa entre otro prevení malesanan manera Chikungunya, Dengue i Zika. P’esei ta un lastimá i ta di lamentá ku apesar di e trabounan intensivo pa protehá salubridat públiko na Boneiru ta sali informashon inkorekto di e departamento.
