Di akuerdo ku e registrashonnan ku a tuma lugá den luna di novèmber último, Minister di Hustisia a disidí, ku lo bolbe organisá un vuelo mas di repatriashon pa Venezuela den luna di desèmber 2020. Tin vários Venezolano na e momentunan aki ku debí na diferente faktor ta deseá di regresá nan pais, entre otro pa ku dianan di fiesta benidero. Aparte di esaki, tin personanan prosedente di Venezuela ku na e momentu aki ta detené en espera di regreso pa nan pais despues di a trata di drenta Kòrsou di forma indokumentá.
Aktualmente, ainda no tin vuelo komersial entre Kòrsou i Venezuela ku por fasilitá Venezolanonan regreso pa nan pais.
En bista di esaki, Minister di Hustisia ta den kombersashon ku Kònsùl di Venezuela, pa logra yega na e posibilidat di un vuelo humanitario pa dia 21 di desèmber próksimo.
Por lo pronto pasashinan lo ta na benta te ku 13 di desèmber prόksimo 16:00 di mèrdia na Curacao Handling Agent na Pietermaai Parking Mall na un preis di US$ 157,–. Esaki ta eksluí e ‘airpot tax’ di US$ 47,–. Pa e vuelo aki lo tin un kantidat di 100 lugá disponibel.
Un pcr-test positivo di 48 ora promé ku e buelo ku ta demostrá ku e persona konserní a tèst negativo pa Covid -19 ta eksigí.
Mas informashon ta optenibel via e link: .
Ta bon pa remarká, ku personanan Venezolano ku pa un òf otro motibu no tin un estadia legal na e momentu aki, i no a risibí anteriormente un desishon di ekspulshon, lo no risibí un desishon ministerial di ekspulshon (verwijderingsbeschikking). Konsekuentemente nan lo no wòrdu prohibí pa regresá dentro di 3 aña.
Si tin residentenan di Kòrsou ku ainda ta pegá na Venezuela, nan tambe lo por hasi uso di e vuelo aki i por kumpra nan ticket serka Curacao Handling Agent. Den kuadro di desaroyonan pa ku Covid-19 nan lo mester aserká reisverificatie team pa risibí pèrmit di entrada na www.gobiernu.cw/reisverificatie. Sin un pèrmit di reisverificatieteam no por abordá e avion pa por regresá Kòrsou.
1 comment
[…] Source link […]