Frakshon di MFK a tuma nota ku bo a saka un invitashon pa trata e lei di presupuesto 2021 djabièrnè 11 di desèmber den un reunion públiko di Parlamento.
Pa medio di esaki frakshon di MFK kier kòrda bo persona ku lei di presupuesto ta un di leinan di mas importante pa ku gobernashon di Kòrsou. Komo miembro di Parlamento nos mester di sufisiente tempu pa por studia e lei aki, pa asina nos por hiba debate na nivel ku Minister di finansa den Parlamento.
Djamars 8 di desèmber pa 20:13 di anochi, Grefir a manda pa miembronan di Parlamento kontestanan riba preguntanan hasi den reunion di komishon sentral di e diferente ministerionan. Riba mes un 8 di desèmber ku e dokumentonan a drenta parlamento ta ser sorprendé ku un konvokashon riba RIS pa tratamentu di lei aki, djabièrnè 11 di desèmber den un reunion públiko. E tempu pa miembronan di Parlamento por prepará i pasa dor di e diferente dokumentonan ta di apénas 2×24 ora, loke no ta sufisiente pa por prepará pa tratamentu di un lei asina importante.
Mirando ku Parlamento tin e tarea di kontrolá gobiernu i salbaguardiá nos demokrasia, frakshon di MFK ta kere ku ta na su lugá tratamentu di e proyekto di lei aki wòrdu kambia pa otro siman dia 15 di desèmber. Nos no por laga e kritiká ku ta biba den pueblo ku Parlamento ta Rubberstamp” di gobiernu sigui perdura. Dor di konvoká e reunion aki di un dia pa otro, ta duna e indikashon un biaha mas ku kier trata e lei aki pura pura i aprobá esaki sin ku miembronan di Parlamento a prepará di forma adekuá pa por debatí riba e lei aki.
Frakshon di MFK ta spera ku Presidente lo bo duna oido na e karta aki i posponé tratamentu di e lei aki te otro siman 15 di desèmber pa asina miembronan di Parlamento tin sufisiente tempu pa prepará nan mes i asina hiba un debate na nivel.
