Parlamentario pa fraccion di AVP, ing Mike de Meza, a repasa e reunion di dialuna atardi caminda Prome Minister den un ‘bijeenkomst’ a bin duna informacion riba plannan cu tin pa futuro di e refineria.
Hunto c’un comision forma pa gobierno, a bin tuna informacion riba e ultimo desaroyonan relaciona cu e refineria na San Nicolas loke mas tanto a mustra riba un tipo di campaña electoral cu a inicia pa pasrtido MEP siman pasa.
Parlamentario de Meza a mustra cu Prome Minister a papia di ‘request expresion of interest’ di dos compania cu ta interesa den reapertura di e refineria caminda nan dos lo complenta otro den e proyecto aki.
Mike de Meza a sigui mustra cu Prome Minister a papia di un compania cu tin e nomber di Quantum LLC y e otro ta carga nomber di Eagle caminda un ta pa e refineria y e otro ta pa e L&G.
E miembro di fraccion di AVP a sigui mustra cu pa loke ta e compania Quantum LLC, Prome Minister a informa cu e compania aki a busca dos consorcio aki na Aruba pa haci invercion den refineria di San Nicolas.
“Ora cu nos a bay busca informacion riba e consorcio aki, nos a bin ripara cu esaki ta un consorcio di spirito ya cu e no ta existi caminda por a mira cu e compania aki a lanta un compania na Texas, Merca cinco luna pasa cu yama Quantum Consorcium Aruba Texas.
Investigacionnan haci ta mustra cu e compania aki ta conoci como ‘po-box company’ cu ta un compania cu ta huur un sala den un edificio, caminda tin un serie di companianan registra na mesun adres aki.
Esey caba pa cuminsa, ta mustra cu e cos aki no por ta serio y otro cos ta cu ora scucha e storia di Prome Minister Evelyn Wever Croes y su comision, anto e ora por mira realmente cu e hendenan aki di berdad no sa di kico nan ta papia.
Nan a bisa cu e refineria lo haya un inversionista cu ta Quantum LLC cu lo bay inverti 3.5 biyon dollar den dos aña den e refineria di San Nicolas y cu esaki lo contribui grandemente na e GDP, papiando di 9% otro aña y na aña 2022 un 20% y despues di esey 11%, cu lo bay crea 2000 cupo di trabou y cu lo yuda baha prijs di gasolin, awa y coriente na Aruba.
Ora cu fraccion di AVP a haci preguntanan na miembronan di e comision y Prome Minister, ken e compania aki ta y kico ta su ‘core business,’ nos a haya como contesta cu e compania aki ta uno di telecomunicacion, pues specialisando su mes riba e tereno ey, e no un compania di telecomunicacion cu nos conoce manera Setar pero simplemente ta haci algun proyecto pa companianan cu ta den e industria di telecomunicacion y tambe nan ta den e industria electrico caminda nan tin solarparks.
Riba nos pregunta si e compania aki a yega di opera un refineria of ta doñas di un refineria, riba su mes of den un consorcio, e contesta cu nos a haya tabata no y nunca e compania a opera un refineria y nunca tabata doño di un refineria.
Esey mesora ta mustra esnan cu conoce e industria aki cu a storia cu e comision y Prome Minister a bin bende den Parlamento, ta un storia irealistico.
