Na Nacionnan Uni dia 31 di oktober 2003, resolución 58/4 a keda aproba, yama UNCAC (United Nations Convention Against Corruption). UNCAC ta un tratado firma entre e miembronan di Nacionnan Uni.
Ta conmemora e dia aki pa reconfirma e compromiso di Nacionnan Uni y nan miembronan den e lucha contra corrupción na cas como afor. E obhetivo mayor ta pa elimina corrupción na tur nivel tanto nacional, como internacional y pa logra e metananan poni encuanto desaroyo sostenibel pa 2030.
Ariba e dia aki, 9 december, full mundo ta conmemora e ”International Anti-Corruption Day” .
Corrupcion ta algo cu na mundo completo ta mina gobernacion y e aparato publico, su institucionnan.
Gobierno, e empleadonan publico y otro trahadornan den servicio di companianan y institucionnan estatal mester percura pa gobierno y su institucionnan estatal hiba un politica limpi sin corrupción.
Corrupcion ta un insulta, na e balornan democrático, na balornan ético, na husticia y na nos estado di derecho. Corrupcion ta menasa e estabilidad y seguridad di nos sociedad y ta un di e principal obstáculo di nos desaroyo económico, pa motivo di ta come un parti grandi di nos finansas publico.
Corrupcion tin hopi cara, no ta solamente e soborno cu ta existi casi tur dia unda ta cumpra politiconan y tambe hopi biaha e empleado publico. Den corrupcion Semper tin dos of mas instancia, esun(nan) cu ta paga, por ta persona of empresa y na otro banda esun(nan) cu ta ricibi e placa of fabornan.
Awendia mundo política a bira sabi y hopi biaha corrupcion ta wordo hinca den un bachi legal.
E riconan y empresarionan ta paga pa e campaña electoral y despues den gobernación ta bini cobra bek den areglonan y hasta den leynan, nobo traha. Tambe tin hopi corrupción den e procesonan di privatisacion di departamentonan y servicionan publico. Corrupcion ta cohiendo plasa no solamente na Aruba, pero na mundo completo.
Internacional Anti-corruption day ta haci un yamada na lidernanan político, lidernan sindical y otro instancianan pa traha hunto contra corrupción dor di cuminsa promove e dia aki y evenementonan relaciona cu e pensamento pa hiba un bida contra corrupcion.
Lo tabata ehemplar si ariba e dia aki tin actividadnan pa promove e dia aki. Mi ta pensa ariba música, evenemento cu oradornan especial kendenan ta bakia ariba e tópico aki.
Bunita ta si gobierno ta laga traha posternan, flyernan y otro materialnan di propaganda pa haci un y tur conciente cu corrupción ta trece dañonan grandi na e maneho di un país.
Refleccion ariba e formanan di corrupción y denuncianan fuertemente
Pesey awe 9 december nos mester reflecciona ariba e fenómeno malo aki, cual ta trece un destrucción grandi na nos sociedad. Corrupcion no tin nada creativo y cu tur nos forsa nos mester bringa corrupción. E forma mihor pa hacie ta dor di denuncia fuertemente tur caso y tambe unda tin tur indicación di corrupción.
Ta pesey 9 december ta e dia internacional pa denuncia y devulga casonan di corrupción.
Siguientemente mi ta menciona algún proyectonan na Aruba, cualnan no por mira claridad di dia, cu nos mester duna atención ariba e dia aki.
Garantianan y mafia Italiano di famia Cuntrera.
Status Aparte a cuminsa ariba un mal pia, Gobierno na 1986 – 1988 a pensa cu proyectonan di garantía lo percura pa Aruba Sali for di e crisis. Mundo político na Aruba no tabata cla pa deal cu e garantianan o mihor bisa pa deal cu mafia Italiano.
Un cos cu nunca no a wordo aclaria ta kende(nan), esta cual politiconan a trece e mafia italiano den picture pa deal cu e garantianan. Pasobra nan no a cay for di cielo
E garantianan aki a costa Aruba demasiado hopi placa.
Otro grupo mafioso tabata e gang di famia Cuntrera, kendenan tabatin hopi actividad na Aruba y sigur después c u nan a bay for di Aruba, den prensa internacional a Sali afor nan relacionnan fuerte cu cartelnan di droga na Colombia, cartel di Medellin y cartel di Cali. Nan tabata funciona manera un banco pa e actividad corrupto aki. Por bisa cu dor di nan Aruba a bira un sorto di paraíso pa transaccionnan di Droga pa USA y Hulanda.
Un carta fuerte cu muestra di nan actividadnan na Aruba, manda na diferente instancianan Hudicial na Aruba y di Reino, a pone nan sali na Careda for di Aruba.
Kendenan tabata e politiconan cu e lasonan fuerte cu mafia, tin hopi rumor, pero oficialmente husticia no a saca nada afor. Dor di presión Politico?
Corrupcionnan cu terenonan
Un actividad conoci ta e negoshinan cu terenonan di Gobierno dor di e diferente ministronan encarga, hunto cu su coordinadornan.
Tur hende cu dosplaca di sinti sa cu e mal practica aki a inicia cu Status Aparte, Ministro Vos (qepd), sorry cu e no t’ey pa defende su mes. Despues a sigui MLT (Marisol Lopez Tromp). Den prensa a Sali hala di acusacionnan di cosnan no-correcto. Despues Ministro Zievinger, contra kende tin acusación pisa dor di OM. Mas después ministro Oduber, contra kende tambe tin acusacionnan di OM.
Ban spera cu Ministro Wever/Croes lo caba cu e malmaneho aki. Maske te awor e ta laba man manera Pontius Pilato y ta laga trahadornan di DIP haci e transacionnan. Tur hende sa cu na DIP, mayoría di trahador ta hendenan sincero y di buena fe, pero tin “rotte appels” eyden.
Finalmente
E comunicado aki ta sirbi pa concientisa pueblo di e lucha contra corrupcion y tambe ariba e importancia di e dia aki pa pone atención y encurasha e lucha contra corrupción pa mantene y logra e metanan di desarroyo sostenibel pa 2030.
Según Nacionnan uni Corrupcion ta costando mundo alrededor di 3,6 trillion di dollarnan ($3.600.000.000.000) cual ta igual na 5% di tur loke nos tur na mundo ta produci.
Corrupcion ta e menasa mas grandi pa no logra e metananan encuanto desaroyo sostenibel na 2030.
T. I. (Transparency Internacional) ta pidi mundo completo pa pone atención ariba e dia aki contra corrupción y pa mundo bira “corruption free”.
