Diputado di finansa a bai sin responsabilisá su mes dilanti Konseho Insular ku ta su dunadó di trabou. Tampoko e diputado a laga un dokumentu di traspaso atras pa su susesor. Komo kolmo de los kolmos sr. Tjin-Asjoe ta anunsiá ku pa mart 2022 e lo ta bèk komo diputado. E desaster di e maneho finansiero ku a keda atras tabata bisto ora ku mester a trata e presupuesto 2021. Nos den Konseho Insular pero tambe esnan ku a sigui e reunion via medionan sosial por a konkluí ku tabatin un negligensia total pa loke ta trata nos finansa públiko. Algu ku por sierto CFT a pone pretu riba blanku den su diferente kartanan di atvertensia’, segun konsehal Daisy Coffie.
Moshon di desaprobashon
Kontinuando Daisy Coffie ta splika: ‘Despues ku mayoria den Konseho Insular a rechasá un moshon di deskonfiansa kontra Kolegio Ehekutivo kompleto i e diputadonan individual, tabata bisto ku e gran mayoria tabatin e sintimentu ku por laga e asuntu aki pasa bai, kreando e impreshon ku partidonan di koalishon ta sostené, apoyá i para tras di e maneho of miho bisá e mal maneho hibá. Mester a manda un atvertensia serio den direkshon di Kolegio Ehekutivo den su totalidat. Mirando esaki, ami komo miembro Daisy Coffie, a traha un moshon di desaprobashon, pero tambe a invitá Kolegio Ehekutivo pa dentro di 90 dia presentá na Konseho Insular un plan di maneho kon ta korigí tur e erornan pa evitá ku e loke a sosodé lo ripití. E motibu di e moshon di desaprobashon tabata ku Kolegio Ehekutivo i su miembronan a rekonosé i atmití ku nan ta karga ko-responsabilidat den e mal maneho i komo tal a pidi diskulpa. Sigur diputado Nina den Heyer a pidi diskulpa i a papia di un bèrgwensa ku Boneiru a pasa aden.’
Sosten pa mal maneho
Konsehal Daisy Coffie ta lamentá ku e moshon aki no a haña oido serka miembronan di Koalishon: ‘Pa e motibu ei mi no a present’é públikamente den e reunion. Koalishon no a realisá ku esaki tabata un oportunidat pa kita e mancha riba e dos partidonan di koalishon. Nan aktitut di no manda un señal fuerte den direkshon di Kolegio Ehekutivo tur kaminda a i ta keda interpretá ku nan ta di akuerdo ku mal maneho i ku sin mas nan ta sigui sostené e mal maneho aki. Ironia di bida ta ku CFT den un karta fechá 1 di desèmber último ta instruí básikamente e mesun kos ku mi a pone den e desishon di mi moshon. Pero aparentemente nos ta preferá pa un instansia no-demokrátiko instruí nos Kolegio Ehekutivo en bes di nos mes karga nos responsabilidat komo representantenan di interes di e pueblo aki. Mi ta spera ku nan ta realisá ku tras di e instrukshon di CFT den su konseho pa sekretario di estado tin “Algemene dan wel Bijzondere Aanwijzing” riba kisas primeramente Kolegio Ehekutivo pa motibo di negligensia di tarea. Asina leu nos ke yega?’
