Pa medio di dekreto gubernamental no. PB 2020 no 97 LB 20/1243 di 8 di sèptember 2020, a stipulá ku riba djabièrnè 19 di mart 2021 tin elekshon pa skohe miembronan pa Parlamento di Kòrsou. E dekreto gubernamental ta stipulá tambe ku dia 21 di yanüari 2021 agrupashonnan polítiko por postulá kandidato pa partisipá na elekshon di 19 di mart 2021.
Konforme Ordenansa di Elekshon (A.B. 2010 no. 87) artíkulo 3, Registro di votadónan ta sera 30 dia promé ku e fecha riba kua tin di entregá lista di kandidato. Esaki ta nifiká ku e registro di votadónan ta sera dia 22 di desèmber 2020, pues ta solamente e siudadanonan ku riba 22 di desèmber 2020 ta inskribí na Registro Sivil, di nashonalidat Hulandes i e persona mester tin òf a kumpli 18 aña dia 19 di mart 2021, por tuma parti na elekshon pa skohe miembronan pa Parlamento di Kòrsou bindero dia 19 di mart 2021.
Pa por partisipá na elekshon di 19 di mart 2021, agrupashonnan polítiko ku entregá un lista di kandidato i ku no ta representá den e Parlamento aktual, mester, konforme artíkulo 16 insiso 1 i 6, di sostén di 1% di e suma di votonan bálido di elekshon di 28 di aprel 2017 (esta 78.830), ku ta por lo ménos 788 votadó. Pa logra esaki, nan mester partisipá na e proseso di sostenementu di lista ku ta tuma lugá riba djasabra 30 i djadumingu 31 di yanüari 2021.
