Kòrsou i Venezuela a kolaborá pa brinda venezolanonan na Kòrsou oportunidat pa bai bèk Venezuela

Djamars último un kantidat di 128 siudadano di pais bisiña Venezuela por a biaha bèk pa nan pais riba un buelo charter di Laser Airlines. E buelo charter aki a bira posibel dor di kolaborashon estrecho entre Kòrsou i Venezuela, pa medio di Konsulado Venezolano.

Manera komuniká resientemente, djamars último a fasilitá habitantenan di Venezuela ku tabata desea di regresá nan pais e  posibilidat pa hasi esaki. Ta trata aki tantu di esnan dokumentá komo esnan indokumentá. Esaki a bira posibel despues ku Kòrsou i Venezuela, pa medio di Kònsùl Venezolano na Kòrsou, a yega na un akuerdo. En total un kantidat di 128 venezolano ku tabata permanesé riba nos isla a biaha bèk pa nan pais.

Di e 128 siudadanonan venezolano 45 ta personanan ku pais Kòrsou a repatriá. E personanan aki, ya ku nan no tabatin pèrmit di residensia, tabata permanesé na Kòrsou den SDKK en espera di nan repatriashon. Un total di 10 persona ku tambe tabata na SDKK no a repatriá, pa motibu ku den nan kaso tin un proseso den kuadro di artíkulo 3 di Tratado Europeo di Derechonan Humano ku ainda ta kanando. Aparte di esakinan, 83 persona (82 adulto i 1 beibi) a bandoná Kòrsou di forma boluntario.

Itinerario di e buelo di charter aki a inisiá na Caracas, loke a brinda personanan na Venezuela ku kier a biaha pa Kòrsou tambe e opshon pa por a bini. E buelo ku a yega for di Caracas tabatin 30 persona na bordo i a regresá Venezuela riba mes un dia.

Den un evaluashon interno ku lo tuma lugá pronto lo disidí si próksimamente ta bai ofresé mas buelo charter. Den kaso ku e desishon aki keda tumá, Gobièrnu di Kòrsou lo anunsiá esaki na tempu, di manera ku siudadanonan venezolano ku ke regresá nan pais por hasi esaki.

Mester indiká ku no ta trata aki di buelonan komersial. Ku otro palabra, por hasi uzo di e tipo di buelonan di charter aki solamente si tin base hustifiká pa un yu di tera òf otro residente di Kòrsou ku ta na Venezuela regresá Kòrsou i vise vèrsa.

Minister di Hustisia ke hasi uzo di e oportunidat aki pa rekonosé e esfuerso inkansabel di Departamento di Imigrashon di Kuerpo Polisial Kòrsou pa a ehekutá desishon di e dos paisnan pa asina  e buelo aki por bira realidat.

Ministerio di Hustisia ta pidi komunidat pa keda pendiente di un posibel buelo mas, basá riba e evaluashon interno ku lo tuma lugá próksimamente.