Partido Inovashon Nashonal (PIN) a tuma nota di e entrevista di 26 di novèmber ultimo di
lider di Frakshon di PAR den parlamento na e programa “Viruswaarheid”, den kual sr.
Walroud ta indiká na forma denigrante, ku ta por medio di ‘knip en plak’ for di diferente
lei e huristanan di gobièrnu a yega na e lei di Estado di Emergensia. Tambe Walroud a
indiká di no ta di akuerdo ku e lei, pero lo vota pro paso e ta ku lomba kontra di muraya,
pa tene Kòrsou habri pa entre otro mantené buelonan for di Ulanda.
PIN ta di opinion k’un lei di Estado di Emergensia pa pais ta nesesario, pero e motibunan ku sr.
Walroud a duna pa su frakshon pa “bulldozer” e lei mañan, ta kompletamente robes i hasta
espantoso. E lider di frakshon di PAR ta splika ku pa motibu turistiko-ekonómiko e ke kita nos
derechinan i limitá nos libertat! Esei e ta konsiderá e meta di e lei i no e kuido kontra di e
malesa di Covid-19. Sinseramente, e desvio di poder, esta maluso di poder, deskribí pa sr.
Walroud ta krea deskonfiansa pa e medidanan gobièrnu tin intenshon pa tuma durante e
pandemia aki ku e lei aki den man.
Despues di a tuma nota di e di e “Di dos Nota di Kambio” i e “Proyekto di lei
modifiká” (Gewijzigd Ontwerp), ámbos di 25 november 2020, PIN ta di opinion ku e puntonan
trese den nos komunikado di 25 novémber último, no a keda kompletamente atendé, p’esei
nos ta spesifiká nan mas kla:
- Formulá e kriterianan pa un situashon eksepshonal mas presis, dor di nòmbra e posibel
situashonnan di krisis kombiná ku menshon ta kua derecho fundamental, spesialmente libertat
di ekspreshon, por keda limitá i durante kua tipo emergensia spesífiko i dikon.
- Klarifiká ku no ta Minister di Asuntunan General so ta disidí ku tin un situashon di
emergensia.
- Determiná den e lei ku aplikashon di regla pa medio di un Areglo Ministerial den un
emergensia konkreto, mester keda ratifiká den 3 siman dor di parlamento sino e ta kaduká.
- Klarifiká artikulo 28 ku spesifikashon di e sirkumstansianan den kua por uza medida di
emergensia sin ku ta mishi ku derechonan básiko.
- No laga ningun duda ku e siudadano por bai Korte, anto stipulá ku esaki ta sin niun gastu
mará na dje i ku Korte ta duna un sentensia dentro di 24 ora.
E posibilidat di maluso di e podernan ankrá den e lei ku segun e deklarashon di parlamentario
Walroud, lider di e frakshon di mas grandi den Staten, e ta apoyá, mester keda
kompletamente eliminá. Pa PIN un pregunta grandi ta, dikón sr. Walroud ta vota pro un lei ku
e ta kontra di dje i no ta protegá nos komo siudadano i proponé kon pa drecha e lei?
Proposishon:
PIN ta proponé na parlamento pa laga un eksperto independiente revisá i adaptá e lei, den e
kaso aki prof. Arjan van Rijn di Universidat di Kòrsou, i ora e revishon ta kla, laga Raad van
Advies bolbé duna konseho riba e lei. Tur esaki por tuma lugá dentro di 1 siman i lo duna
pueblo un sentido di trankilidat.
