Lider di fraccion di AVP para dilanti di oficina di AZV na Camacuri, a mustra durante conferencia di prensa cu ta bon pa recorda cu director di AZV, a wordo cori pa Minister Dangui Oduber.
El a wordo retira pa motibo cu e director a logra via di e compania Light Life, pa garantisa cu esunnan cu tin mester di transporte pa bay por ehempel dialyse of bay haci testnan na hospital, por haya e servicio aki, segun parlamentario marlon Sneek.
“Director di AZV a logra di haya un miho prijs pa di e forma aki garantisa e servicio aki pa nos ciudadanonan pero Minister Oduber no a keda contento cu e decision aki di e director di AZV.
Minister a dicidi di core cu e director, cu a costa pueblo miles di florin pa e ‘golden handshake’ cu a dun’e pa e bay, pues den e situacion dificil caminda no tin entrada, Minister a dicidi di bay duna e director un golden handshake y pa core cune, ya cu supuestamente e lo a haci algo cu no ta corecto.
Sinembargo dia cu e cos ey a pasa, nos di AVP tabata para aki nan tambe, na mesun sitio aki y nos a bisa e tempo ey cu e maniobra di Minister Oduber, no ta nada mas y nada menos, cu ta fixmento tin.
Minister pa traha un team di su mesun campañadonan, su mesun coordinadonan, pa nan bay transporta pashent si tuma na consideracion cu nan tin experiencia, sin tene cuenta si nan tin e diplomanan pa atende cu e personanan cu ta rekeri e servicio di tranporte.
Ta hendenan cu por bira malo durante di transporte y esunnan cu ta transporta e hendenan si nan no por brinda asistencia na e personanan aki, e persona por muri na su man pero awe nos a bin haya sa e realidad, e berdad di tur e maniobranan aki di e Minister.
Fraccion di AVP tin un copia di un decision di Conseho di Minister di dia 5 di december di 2017 cu ‘volgnummer’ 25148, cu ta un lista di campañadonan di Minister Dangui Oduber cu el a pone como coordinadornan.
Entre otro tin coordonador B, nan ta bewaker, medewerker, bode, bewaker medewerker, administratief medewerker y esaki nos tin e ‘besluit’ di dia 5 di december 2017 y tambe nos a bin haya e ‘besluit’ di dia 11 di november net prome cu e fecha di Friday the 13th, e dia cu nan a colga e pais aki su autonomia.
Prome di a entrega tur cos, gobierno a fix nan campañadonan, caminda e mesun shete nombernan cu ta riba e lista di coordinado, awe a haya un contract di cinco aña.
A crea un departamento nobo na departamento di salubridad publico cu ta un departamento di transport, pa fix campañadonan y aki gobierno a lubida loke nan mes a grita asina hopi, esta cu gobierno ta bin cu nan y gobierno tin cu bay cu nan.
Awe pueblo por mira con manera ladron den anochi dia 11 di september, net prome cu a firma e acuerdo cu Hulanda, entregando autonomia, entregando tur cos, a fix pa campañado si, pa tin hende cu por pega borchi, pa tin hende pa core rond haci desorden y papia bon di e minister.
Si bay wak bon, tur e hendenan aki ta papia bon di e minister riba facebook pero ta claro, ken no despues di caba di haya un contract di cinco aña pa garantisa bo entrada.
Gabinete Wever Croes a pidi ambtenaarnan pa entrega 12.5%, na januari contratistanan cu ta haci limpi banda di caminda, ta bay haya un recorte di 50% di loke ta e parti di transport y brandstof y nan tin cu wak con nan lo sigui funciona.
Anto Minister ta bin fix campañado?
Abo cu mester baha, ya cu ta esey ta un di e problemanan cu nos tin, esey ta un di e cosnan cu Minister Presidente a priminti, cu supuestamente e lo bay baha gastonan di personal, anto Minister Oduber ta sigui nombra personal den servicio di gobierno.
Igualmente diaranson caminda AVP a cuminsa haya informacion y nos lo haya documento oficial den proximo dianan, cu na departamento di impuesto aki mes, tambe tin nombracion tumando luga, as we speak.
Pues un ‘afscheidbeleid’, caminda ta pone nan hendenan den posicionnan prome cu nan bay, pa nan tin hende pa core campaña, ta garantisa nan un entrada pero si di otro banda ta bira corta e ambtenaar cu tin 25 y 30 aña ta trahando pa e pais aki, mandando e pais aki dilanti.
Ta bira kita for di dje mita vakantiegeld, corta den bashi premie y en total kita un 12.5% for di entrada di e trahadonan aki, anto abo ta sigui nombra ‘friends and family.’
Si bo sigui corta entrada di e ambtenaar pero na mes momento ta sigui nombra mas trahado, e gastonan riba personal, ta bay keda halto y ya nos por a mira caba con e Hulandesnan a cuminsa keiro na Aruba, pa buta ordo riba gobierno, pa corta den autonomia di e pais aki.
Nos por a mira cu e mesun Friday the 13th ey, dia 13 di november caminda a firma e acuerdo cu gobierno di Aruba, caminda a entrega autonomia y un rato despues riba mesun dia aki, a manda un carta pa Tweede Kamer.
Den e carta ta mustra cu e dificit cu Aruba tin aworaki di 1 biyon, no por keda 1 biyon y cu mester baha esaki te cu 800 miyon loke ta nifica cu e presupuesto supletorio cu e cheerleadernan a vota p’e, mester tia cos afo y bay traha un presupuesto supletorio nobo.
40 miyon cu gobierno a pone cu lo wordo inverti na A. B y C, tampoco por mas ya cu a pidi pa gobierno bay documenta esaki y mande pa CFT anto nan lo dicidi si gobierno por bay haci e inversionnan aki.
Den e situacion precario aki, den e grito pa pidi trahadonan publico pa sacrifica y entrega, anto abo ta sigui nombra hende, abo ta sigui firma contract pa bo campañadonan, pa bo friends and family y e cos aki ta inaceptabel,” lider di fraccion di AVP, Marlon Sneek a declara.