Pa un gobièrnu manehá kualke kalamidat i/o un situashon eksepshonal, e gobièrnu mester di e hèrmèntnan nesesario. Un di e hèrmèntnan ku tabata falta i ku den kurso di e último lunanan pa gabinete Rhuggenaath a bira hopi nesesario, ta e lei di emergensia ku for di 2018 ta den tratamentu na parlamento i ku awor ta kla pa bai na votashon final.
Sin e lei di emergensia gabinete Rhuggenaath den e krísis di Covid simplemente no por garantisá ku lo por tene e kantidat di kontagionan lokal di Covid riba un nivel aseptabel i manehabel. Esaki ya ku komportashon di sierto gruponan den nos komunidat mas i mas ta laga di deseá i kada bes ta bira mas difísil pa outoridatnan aktua riba e tendensia aki sin un base legal fuerte den lei. Ku otro palabra: e lei di emergensia mester drenta na vigor pa kaba òf lei di naturalesa lo bai konta i esei ta ku solamente esnan di mas fuerte lo bai sobrebibí ora nan wòrdu kontagiá ku Covid.
Frakshon di PAR, konsiente di su responsabilidat na un manera firme ta deklará ku kada miembro di e frakshon lo duna sosten pa e lei di emergensia mira lus di dia i asina no solamente kumpli ku e areglo di estado di Kòrsou, pero prinsipalmente duna gabinete Rhugenaath e hèrmènt ku e tin mester pa kombatí Covid. Frakshon di PAR ta urgi tur otro frakshon den parlamento pa duna nan aporte pa pasa e lei si no plamamentu di Covid i kada morto mas ku kai den e bataya kontra Covid lo kai riba nan konsenshi.
