Na momento ku Nashonal drenta gobernashon lo drai esaki mesora bèk!
Willemstad – Partido Nashonal di Pueblo a tuma nota di e konsternashon riba e proposishon di lei ‘Landsverordening Uitzonderingstoestand (168)’. E punto prinsipal ku nos lo ke komprondé ta si den un isla chikí manera Kòrsou, un lei ku un embergadura asina akí ta realmente nesesario? Kiko ta e meta real tras di esaki?
Pueblo, habri bo wowo bon, paso nos lo hasi algun pregunta na bo pa bo mes komprondé! Kon por ta posibel ku ta apoderá kualke ámtenar ke Minister asigná pa por kita bo telefon i kòmpiuter for di bo i bo mester koperá sigun artíkulo 9?
Artíkulo 12 ta stipulá ku un ámtenar por drenta bo kas sin apoderashon di hues promé anto despues ponebo na altura. No ta den un estado militar nos ta biba, tòg? Artíkulo 10 di e lei akí ta kita bo e libertat pa por ekspresá bo mes manera bo ta deseá. libertat di ekspreshon, ta kiko esaki ta?
I mas pió ainda den artíkulo 11 ta kita bo derechi pa subi kaya i demonstrá, artíkulo 13/14 ta pone ku por tap bo sin ku e órgano ku ta tap bo a haña apoderashon previo pa hasié i sigun artíkulo 15 Minister por kita bo kosnan for di bo. Di demokrasia nos a kai den un estado di totalítarismo. Si un ámtenar no gusta bo kara, e tin ku djis pensa ku pe bo ta un sospechoso i e ta kue tur kos den beslag ku bo a traha duru pe. E kas i e outo ku ba traha pe ku sodo di bo frenta, lubidá numa riba dje paso Minister ta sòru den artíkulo 17 ku Minister por kita bo kosnan pa gobièrnu usa i hasta kita bo propiedat. Anto abo si tin mag di sigui paga bo mes bo hipotek òf bo fiansa personal. Shonnan, ta unda nos ta bai asina? Ta unabuso di poder esaki ta sin ku e siudadano tin un derechi ku ta salbaguardiá su interes! Atrobe nos ta ripití, ta kiko ta e meta real tras di e lei aki?
Ta imposibel ku den e tempu di krísis ku nos tur ta pasando aki, ta uza e pandemia di COVID-19 komo un esküs riba tur kos. Ku e proposishon di lei aki ku ta paralelo ku esun krea na Hulanda pa únikamente tempunan di guera, ke pasa riba tur derechonan fundamental humano, libertat di ekspreshon, pone bos di pueblo nos parlamento un banda pa n’e momentunan aki pasa un lei diktatorial asin’aki. Ta asina leu nos a yega ku nos outonomia i ta asina tantu set di poder e Gobièrnu aki tin ku hasta ta ankra abusu di poder den un lei?
Ku ki sinseridat ta atendiendo ku e situashon agudo ku nos pueblo ta aden?
Ta imposibel ku ke krea espasio pa na un lider estilo ‘Hitler’ komandá o mal uza nos derechi di estado. Asta ‘Raad van Advies’ a duna konseho negativo riba esaki pero den su set pa malusá poder, Gobièrnu ke sigui primi pa e lei aki bin na vigor sin respetá nos Areglo di Estado.
Ta e gobièrnu aktual aki ku nos tin so por a sasia su set pa hasi malusá di poder dor di krea un lei ‘rommelig’ ku no ta spesifiká den ken i kiko bo ta duna tantu outoridat den bo nashon. Nos base demokrátiko ta wòrdu mina . Na momento ku Parlamento di Kòrsou akseptá e lei aki no tin awa pa laba. Un lei kaminda un oposishon lo no tin ni forsa aden pa balansa nos realidat i sali na nos reskate. Kiko e intenshon berdadero ta di Gabinete Ruggenaath/Martina ku e lei aki? PNP ta puntra su mes kiko nos ta hasiendo òf kreando di nos pais?
P’esei Partido Nashonal di Pueblo ta di opinion ku mester drai bèk e forma ku ta bai pasa e proposishon di lei akí.
Lider di Partido Nashonal di Pueblo
Ruthmilda Larmonie-Cecilia
