Parlamentario Endy Croes a tuma nota cu Tante Sidonie di AVP esta Mervin Wyatt Ras tabata na yoramento den prensa atrobe fin di siman pasa. Pa esnan cu no conose Tante Sidonie ta un figura den un cartoon di antes hopi popular esta Suske en Wiske. Tante Sidonie a asumi e rol di un “machi” hopi pero hopi amarga. Pues ora scucha e gritonan di Mervin Wyatt Ras den prensa ta pone nos pensamento bay bek den tempo recordando Tante Sidonia. Mervin ta sinonimo di tante Sidonie. Yegando final di aña 2020 porcierto un aña cu a bay hopi dificil y cu lo keda graba den historia como un aña cu e Pandemia Covid 19 a causa masha hopi dolor, hende no por ta malagradicido y kier buska probecho politico satisfaciendo su mes pa critica su contricantenan na un manera infunda.
Segun Tante Sidonie cu Lider di AVP a ofrese pa ta parti di e deliberacion:
Mervin Wyatt Ras den su yoradera a expresa cu Lider di AVP esta Mike Eman a ofrese su mes pa ta parti di e deliberacionnan cu Hulanda pa buska e solucion. Que Barbaridad! Mester recorda Mervin con su Lider Mike Eman a “delibera” cu Hulanda na 2014 momento cu Hulanda a duna Mike Eman y AVP e famoso “KB” esta e Koninklijke Besluit riba e malmaneho financiero y a kita e “pen” for di Mike. Enbes cu Mike Eman a subi avion bay Hulanda bay “delibera” pa buska un solucion Mike Eman a escohe pa bay den welga di hamber, bebe ensure scondi anochi, paralisa gobernasion, jama su coordinador y candidatonan pa bay bati weya manera mucha chiquito, tirando webo y ijs riba auto di Gobernador e tempo aya. Prohibi pa lubida! Esaki ta fresco den memoria di henter pueblo ainda. Awor Mervin kier pretende cu ta Mike Eman tin e solucion y ta Mike Eman sa con pa “delibera” cu Hulanda pa combense e Hulandesnan y cu e gobierno actual lo a nenga ayudo di Mike Eman. Pa tur klaridad mester recorda Mervin Wyatt Ras cu tur Lidernan di partidonan politico te hasta esnan “sin asiento” pafor di Parlamento a ricibi invitacion pa debati riba e pakete cu Hulanda a manda. Mike Eman a bolbe bay sconde y a manda Robert Candelaria e promer ronda y e di dos biaha AVP no a show up tampoko a manda representante.
AVP y Mervin Wyatt Ras a desgracia Aruba financieramente:
Nos a hasi nos huiswerk y a controla un rato kiko tabata Mervin Wyatt Ras su posicion durante 8 aña y con Mervin Wyatt Ras a vota pa e 8 presupuestonan di pais Aruba cual maneho hustamente a “kibra” e pais aki na werki. Por a tuma nota cu Mervin a grita y vota “voor” y a aproba tur e 8 presupuesto di Mike Eman y AVP desde 2010 -2017. Tur pero tur e presupuestonan aki tabata tin deficit nan grandi. Pues mester presta miyones pa tapa e buraconan den presupuesto. A presta un total di 2200 miyon florin pa solamente sera e buraconan riba presupuesto pa e fiesta por a sigui. Nunka Mervin a pensa cu akinan e por a hasi un diferencia pa su pais? Nunka el a pensa pa cuestiona gobierno pakiko tanto deroche di plaka? Nunka el a pensa cu si el a hasi su trabou na drechi e por a scapa Aruba? Nunka el a pensa cu si el a controla gobierno y frena e fiesta door di NO aproba e lokuranan aki awe Aruba lo tabata salba? Mervin No ta conciente cu si el a controla nunka e LAFT no lo a bin na 2015? Si Mervin a controla Mike Eman y AVP y a vota contra e deroche di plaka di AVP awe Aruba lo por a sali afor riba su propio forsa y sin Rijkswet. Esaki ta e berdadero voldongen feit.
