Diaranson merdia Minister Maduro a reuni cu e gremio comercial ATIA y AHATA. E mandatario a informa cu Aruba a yega na un acuerdo cu Hulanda den cual ta sigura, entre otro, e sosten di likides pa por yuda cu Subsidio di Salario na comercio. Tambe a brinda un splicacion riba e trabounan cu ta wordo haci riba e tereno di flexibilisacion di e subsidio y tambe di e parti laboral cu proximamente lo keda trata den e dialogo tripartiet. Durante e reunion Minister Xiomara Maduro a splica tambe riba Alivio Fiscal 2 den cual a cumpli cu gran parti di e deseonan di e gremio comercial. Gobierno ta purba pa yuda comercio surpasa e crisis, pero e realidad ta cu Gobierno su posicion di likides tambe ta grandemente afecta pa e crisis. Banda di esaki nos Pais ta bou supervision financiero cu ta pone cu no ta tur yudansa cu ta wordo pidi pa comercio, por wordo duna. Minister Xiomara Maduro ta spera cu awor cu a yega na un acuerdo cu Hulanda, gremio comercial por haya e trankilidad cu nan ta boga pe pa asina nan por keda lora economia na beneficio di tur hende na Aruba.
