Parlamentario Alan Howell tabata presente dialuna mainta na apertura di e Aruba Adventist Academy na San Nicolas, cual a cuminsa oficialmente cu un total di 200 alumno. Lesnan cu ta wordo duna ta bay pa muchanan for di kleuter te educacion secundario.
Gobierno hunto cu Soaza, cu ta e fundacion di iglesia adventista a crea e oportunidad aki den cual e muchahan por sigui un educacion sea na Hulandes, Ingles of Spaño. Di e forma aki e ta bira e prome scol na Spaño na Aruba cual ta specialmente designa pa e muchanan migrante. Muchanan lo haya nan i-pad for di cual nan por sigui nan programa escolar bou guia di e maestronan eynan.
Alan Howell ta considera e scol aki uno special teniendo na cuenta cu e ta brinda e oportunidad na e muchanan cu ta bin di otro paisnan y cu no ta domina e Hulandes ora nan yega Aruba, pa sigui nan les na Ingles of Spaño. Asina ta evita cu nan cay atras den nan studio pasobra nan no por incorpora di biaha den e sistema escolar di Aruba. Howell por a scucha for di e president di e fundacion durante su discurso cu Minister Lampe tabata un gran ayudo pa por a logra e gran vision aki na bienestar di mucha y hoben.
No por keda sin menciona otro punto hopi importante pa Howell, esta cu enseñansa di Dios ta central na e scol aki.
Parlamentario di POR ta felicta directiva di Aruba Adventist Academy y gobierno cu e gran oportunidad aki cu ta brindando na e muchanan pa por sigui cu nan estudio y desaroya nan mes na e miho manera posibel den futuro. E ta confia cu dentro di poco, e scol aki lo por tin oportunidad di expande y asina brinda mas mucha e posibilidad di sigui nan estudio den e diferente indiomanan cu Aruba Adventist Academy ta ofrece. “Let’s build more schools and less prisons”.
