Recientemente a tuma luga e tayer virtual di ‘Social Economy, an opportunity to transform the Europe of the Sea’ durante cual Minister Maduro a hiba un discurso di apertura y na unda representantenan politico di Mayotte y Groenland tambe a hiba palabra.
Participacion di Pais Aruba
E tayer aki a wordo organisa pa Union Europeo (EU) cu participacion di representantenan di Aruba, Mayotte y Groenland. Zulema Dabian-Erasmus di Departamento di Asuntonan Economico a participa como representante di Aruba. Ademas dos comerciante di negoshinanan chikito cu ta contribui na Economia Social y Entreneurship Social, sr. Rendell de Kort di Cornerstone Economics y sra. Lucia White di Happyponics a presenta nan modelo di negoshi na tur e demas participantenan europeo. E ‘best practices’ y discusionnan lo wordo inventarisa den un rapport y presenta na EU.
Economia Social y Economia di Solidaridad
Durante su discurso e mandatario a enfatisa cu e tayer aki nos ta haya e oportunidad di intercambia di experiencia, siña di otro y traha cu otro. Esaki lo yuda nos construi economianan mas resiliente y tambe Pais Aruba por tuma parti na e network grandi di Paisnan di Europa pa asina engrandece nos visibilidad riba Economia Social y Economia di Solidaridad. Minister Maduro a menciona cu e pandemia di COVID-19 a trece mescos cu otro pais na mundo, hopi reto pa e comunidad di comercio na Aruba. Pero como un comunidad resiliente e entrepeneurnan Arubano tabata hopi creativo na e manera cu nan a responde na e crisis. Negoshinan chikito y mediano a adapta nan modelo di haci negoshi, inclui actividad social, no na interes financiero pero mas pa ta solidario cu nos comunidad. Tur e cambionan aki a haci posibel cu e negoshinan por a sigui draai durante e temporada di pandemia. E mandatario ta subraya cu e catalisator mas importante ta e solidaridad cu e comunidad Arubano a demostra pa cu e productornan local y e apoyo na NGOnan local.
E dignatario ta sigui bisa cu mundo a cambia, nos comunidadnan chikito a cambia y ta e entrepeneurnan ta esunan na timon di e cambionan aki. Solamente door di ta creativo den manera di haci negoshi un negoshi por sobrevivi y genera empleo den e temporada aki. E mandatario ta enfatisa pa laga nos usa e momento di creatividad y entrepeneurship social aki pa ‘jumpstart’ nos economia y bira mas resiliente.
Gradicimento
Minister Xiomara Maduro a yama e representantenan di Mayotte y Groenland danki pa traha hunto cu Aruba den e consorcio pa haci Economia Social parti di nan agenda inter regional mas amplio. Alabes e mandatario a gradici Comision Europeo pa facilita e plataforma di colaboracion riba Economia Social y Entrepeneurship Social y a desea e participantenan hopi exito.
