Na momento cu nos a drenta gobierno partidonan MEP-POR-RED a firma un acuerdo di gobernacion conhunto cu un programma. Den e acuerdo aki partidonan a acorda cu lo explora e posibilidadnan pa e industria di cannabis medicinal.
E proceso pa legalisa e uso di cannabis medicinal, legalia e cultivacion y procesamento di cannabis a cuminsa for di hopi tempo.
Pa por maneha e industria aki conforme reglanan internacional (Enkelvoudig Verdrag van de Verenigde Naties inzake verdovende middelen van 1961), Gobierno di Aruba ta institui un departamento nobo, Bureau Medicinal Cannabis Aruba (BMCA). E departamento aki lo bira e autoridad oficial di Gobierno pa duna autorisacion pa cada importacion y exportacion di cannabis medicinal cu wordo produci na Aruba. Unabes e permiso di cultivo y/of extraccion wordo otorga na esnan cu ricibi e licensia, e inversionista local y/of internacional tin e obligacion conforme e reglanan internacional di e ‘Enkelvoudig Verdrag 1961,’ di wordo controla door di e International Narcotic Board (INCB). E tarea principal di BMCA ta pa controla cu tur inversionista ta tene nan mes na e regulacion di International Narcotic Board (INCB) y INCB lo controla BMCA regularmente pa wak si e inversionista y BMCA ta traha conforme e tratado internacional di 1961.
Na december 2019 caba gobierno a legalisa e importacion di cannabis medicinal camina por importa productonan CBD cu ta contene menos di 0.2% THC.
Paralelo na e lantamento di e departamento Bureau Medicinal Cannabis a cuminsa e trayecto pa cambia, adapta e ley pa esaki wordo manda DWJZ y Raad van Advies pa despues trata esaki den parlamento di Aruba. Cu e cambio aki lo permiti pa gobierno duna ‘’verlof” pa cultivacion y procesamento di cannabis na Aruba.
E Ley di ‘Landsverordening Verdovende Middelen’ a wordo adapta pa por cultiva y exporta cannabis pa rasonan medicinal. E ley a pasa su trayecto di legislacion (wetgevingstraject) y ta warda awor pa wordo trata den Parlamento pa haci’e posibel cu por otorga licencia, cultiva, haci extraccion y exporta cannabis pa traha e producto final medicinal den exterior.
Minister Oduber tin cu bisa cu e ta e minister pa ehecuta esaki pero cannabis ta un vision cu lider di fraccion di RED sr Ricardo Croes tin pa hopi anjas. E ta un industria cu sr Croes pa hopi anja a boga pe y e gobierno aki lo haci esaki un realidad.
Na momento nos a firma e acuerdo di gobernacion nos a kere den cannabis medicinal y ta pesey tur e esfuerzonan a wordo haci pa yega caminda cu nos ta awe.
Ningun gobierno den historia di pais Aruba no a encamina e proceso aki pero e gobierno aki ta demostrando cu hechos cu nos ta cumpliendo cabalmente cu nos programma di gobernacion.
Nos ta spera cu dentro di poco parlamento di Aruba por debati riba e cambionan di e ley aki cu lo bai yuda pa crea un industria nobo pa Aruba. Nos a scucha caba cu fraccion di AVP ta contra e desaroyo aki y a laga sa cu tur permiso cu wordo duna, si AVP yega bek un dia den gobierno, lo trek tur permiso in. Nan no ta kere den cannabis medicinal y den diversificacion di nos economia.
Gobierno ja caba a publica e request of experssion of interest caminda hopi grupo a expresa interes den e industria aki. Siguentemente gobierno lo anuncia cual ta e proceso cu ta sigui pa finalmente otorga e permisonan necesario pa cultivacion of procesamento di cannabis cu metanan pa uso medicinal.
Minister Dangui Oduber:
E ley pa permiti cultivacion di Cannabis ta cla pa wordo trata dentro di poco
