Edificio di Bestuurskantoor a wordo ilumina cu luz blauw cla
Oranjestad – Diasabra nochi Gobierno di Aruba a conmemora 75 aniversario di Nacionan Uni y a uni cu henter mundo y a ilumina e edificio di Bestuurskantoor cu luz blauw cla. Nacionan Uni a wordo lanta despues di segunda Guera Mundial cu tin e meta pa para sufrimento humano, mantene pas, seguridad internacional, desaroya relacionnan estrecho y amical entre paisnan, promove derechonan humano y progreso social pa un mihor nivel di bida pa humanidad. Paisnan rond mundo ta uni cu Nacionan Uni pa logra e metanan aki.
Metanan pa Desaroyo Sostenibel
Minister Maduro ta subraya cu na aña 2015 Nacionan Uni a bin cu e Agenda 2030 di e Metanan pa Desaroyo Sostenibel (SDGs) y Gobierno di Aruba a sostene y a compromete na e metanan aki. Dia 25 di september ultimo Gobierno a conmemora den solidaridad cu mundo pa celebra cu 5 aña pasa 189 pais a adopta e Metanan aki y a para keto na e importancia di esakinan y con e Metanan ta forma un compas, un guia pa nos yega na un mihor nivel di prosperidad pa un y tur y den harmonia cu naturalesa. Den cuadro di e 75 aniversario di Nacionan Uni y di 5 aña di e Metanan di Desaroyo Sostenibel Pais Aruba ta mantene su compromiso cu e 17 metanan di Metanan Sostenibel.
Mundo henter ta confrontando otro reto
E mandatario ta enfatisa cu na ocasion di e 75 aniversario di Nacionan Uni, atrobe mundo henter ta enfrentando un otro reto, apesar cu e pandemia di COVID-19 no por wordo compara cu un Guera Mundial; pero pa prome biaha desde cu Nacionan Uni a lanta, ta surgi un otro crisis na nivel mundial. E dignatario ta bisa cu esaki ta pone cu Paisnan mester traha cu e mesun dedicacion, pa por recupera for di e crisis aki. Solamente poniendo enfoke ariba e principionan pa cual Nacionan Uni a wordo lanta nos por sigui desaroya como pais sin laga ningun hende atras.
Solidaridad internacional
E Secretario General di Nacionan Uni, Sr. Antonio Guterres a bisa den su discurso diasabra cu paisnan mester di ta solidario rond mundo; ela haci un yamada pa Paisnan uni y actua hunto pa lucha contra di COVID-19, preveni catastrofe di nos clima, defende igualdad di hende muhe y hende homber pa asina por yega na un mundo mas sigur, saludabel, mas husto y sostenibel.
Minister Xiomara Maduro a subraya cu Nacionan Uni por conta cu Pais Aruba pa logra esakinan paso nos ta keda kere den e posibilidanan cu a yuda mundo sali for di un crisis mundial despues di Segunda Guera Mundial ora cu e Nacionan Uni a lanta. Gobierno di Aruba ta keda cu fe y speransa cu por crea un bida digno y un miho futuro pa tur ciudadano y Pais Aruba ta uni na cu otro pais pa conhuntamente recupera y sali padilanti. E mandatario ta enfatisa cu awor mas cu nunca paisnan rond mundo mester uni, tuma accion y coopera cu otro pa hunto nos por crea un futuro sostenibel pa nos tur.
Edificio di Bestuurskantoor a wordo ilumina cu luz blauw cla
Diasabra nochi rond mundo a cende lusnan blauw cla na monumento y edificionan y Pais Aruba a uni na esaki pa asina conmemora e di 75 aniversario di Nacionan Uni y brinda homenahe na tur esnan cu a lanta e organisacion aki y recorda locual e organisacion mundial aki ta para pe.
Minister Maduro na nomber di Gobierno di Aruba y pueblo di Aruba a felicita Nacionan Uni y tur Paisnan miembro cu e celebracion importante aki. Minister Maduro hunto cu Minister Lampe y presidente di Comision di SDGs sra. Jocelyne Croes a cende e luz blauw cla y asina ilumina e edificio di Bestuurskantoor pa asina enfoka ariba e posibilidadnan cu nos tin nos dilanti pa yega na un mihor mundo pa henter humanidad.
