Nos ta bay Hulanda den bapor Frances!
Parlamentario Endy Croes y Fraccion di MEP ta siguiendo e desaroyo na airport hopi di serca. Berdad ta cu Aruba y mundo henter ta bibando den un incertidumbre alrespecto e efectonan di corona virus. Esaki a afecta economia di Aruba hopi fuerte y nos tin compresion pa e situacion cu mayoria empresa ta pasando aden y hustamente pa e rasonnan aki gobierno ta dunando Loonsubsidie y MKB steun pa sostene comercio den e proceso aki y asina mantene e cuidadano na trabou y cu pan riba mesa.
/// Joost Meijs ta ofresiendo pakete contra boluntad:
E Directuer actual di Airport hunto cu staff a haña ta oportuno na e momentonan aki pa ofrese empeladonan pakete na un manera contra di nan boluntad y a forsa un grupo di 27 persona pa tuma dicho pakete mei mei den crisis. Esaki no tabata tur y awor Joost Meijs kier sigui pusha den un segundo fase unda 35 persona mas lo wordo forsa contra nan boluntad cu un menasa si no acepta esaki promer cu dia 30 di October AAA lo hiba nan corte cu e chens cu nan lo ricibi menos cu lokual ta wordo ofresi awor. Joost Meijers ta actuando contra instrucion, contra boluntad y contra maneho di gobierno na e momentonan aki. Sea Joost Meijs ta scucha den bon of Joost Meijs lo scucha na malo pero e actitud aki ta inacceptabel.
/// Kiko ta e pakete actual y e instruccion di gobierno?
Actualmente Airport ta ofresiendo 1 luna di salaris pa cada aña di servicio mas 4 luna adicional pa esnan cu firma promer cu 31 di October proximo. Esaki ta specificamente pa e personanan cu ta trahando den algun departamentonan cu lo stop di existi den Plan di reorganisacion di Joost Meijs. Gobierno sinembargo a instrui AAA y Joost Meijs pa ofrese mesun pakete aki pero “boluntario” y no na grupo selecta pero na henter Aiport ademas sin ningun menasa pa hiba ningun empleado corte. Kisas por tin un x- cantidad di empleado, den e total di algo mas cu 200 empleado, cu si ta interesa boluntariamente pa tuma e pakete aki . Punto dos gobierno a duna instrucion cu e deadline di 30 di October lo wordo movi pa 30 di Januari 2021. Den luna di Januari 2021 lo evalua cuanto persona si kier a tuma dicho pakete y lo re-evalua posicion financiero di airport usando cifrasnan mas actualisa y saliendo di un punto di bista realistico kisas averahe di añanan 2016-2017-2018 como benchmark y no solamente 2019 manera awor ta e caso. Pakiko? Parlamentario Croes ta splika cu 2019 tabata e mihor aña den historia di airport y ta un “uitschieter” y hustamente riba esaki Joost Meijers hunto cu AAA na un manera tendencioso a hasi projecionnan y berdaderamente den comparacion cu e cifrasnan aki airport lo dura mucho mas aña pa recupera y talves alkansa e cifrasnan aki bek. Esaki ta un manera fini di manipulacion esta manipulando empleado, gobierno y henter un pueblo. A jega na nos conosemento cu Joost Meijs lo no kier respeta instrucion di gobierno kende ta 100% doño di AAA como e unico aandeelhouder. Tambe a compronde cu fin di siman pasa a trata esaki den Ministerraad y tin un desicion nobo alrespecto esaki. Si ainda no tin compresion pa e “beleid” cu gobierno ta hibando den crisis y Joost Meijs kier pusha den un otro direcion ta momento tanto Joost Miejers y Board di AAA wordo retira. Nos ta bay Hulanda den bapor Frances!
